რობერტ მორენო: ამიერიდან, ფეხბურთში აღარაფერი გამაკვირვებს

ესპანეთის ნაკრების ყოფილმა მწვრთნელმა, რობერტ მორენომ ერნესტო ვალვერდეს "ბარსელონადან" გაშვების მაგალითი მოიხმო იმის დასამტკიცებლად, რომ თანამედროვე ფეხბურთში კარგი შედეგი მწვრთნელისთვის პოსტზე დარჩენის გარანტიას არ იძლევა.

"თანამედროვე მსოფლიო ფეხბურთში არაფერი მაკვირვებს, არაფერი, ამის მაგალითი თავად ვარ. მე ვიცნობ ვალვერდეს. რაც მოხდა, მისთვის კარგი ნამდვილად არ არის. მე მას პატივს ვცემ და მხარს ვუჭერ. არ ვიცნობ სეტიენს, თუმცა ვხედავდი მის გაწვრთნილ გუნდებს და მომწონს მისი სტილი. მე მას წარმატებებს ვუსურვებ. ვყოფილვარ "ბარსელონაში", ბარსელონადან ვარ და კლუბის ფეხბურთელებს შორის მეგობრებიც მყავს." - ციტირებს მორენოს სიტყვებს Tribuna.

მორენო, ჯერ "ბარსელონაში", ხოლო შემდეგ ესპანეთის ნაკრებში ლუის ენრიკეს ასისტენტად მუშაობდა, მაგრამ ლუჩოს პირადი ტრაგედიისა და გუნდიდან წასვლის შემდეგ, "ლა როხას" თავკაცი თავად გახდა. მისი მწვრთნელობისას ნაკრებმა 7 გამარჯვება მოიპოვა, ორი თამაში ფრედ დაასრულა და ევროპის 2020 წლის ჩემპიონატის საკვალიფიკაციო ეტაპიც წარმატებით დასძლია. ლუის ენრიკეს დაბრუნების შემდეგ მორენო გაათავისუფლეს და ახლა იგი "მონაკოს" წვრთნის.