"მანჩესტერ სიტის" მესის 70 მილიონად შეცდომით შეძენამდე ცოტა დააკლდა
"მანჩესტერ სიტის" ყოფილი აღმასრულებელი დირექტორი გარი კუკი 11 წლის წინ მომხდარ საინტერესო შემთხვევას იხსენებს.
კუკის თქმით, 2008 წელს, მან ლეო მესის 70 მილიონ ფუნტად შეძენა შეცდომით სცადა.
იმ დროს, "მანჩესტერ სიტი" კარლოს ტევესის ტრანსფერზე მუშაობდა. ერთ-ერთი საუბრის დროს, რომელსაც კლუბის მესაკუთრე თაკსინ შინავატრა, მისი წარმომადგენელი პაიროჟ პიემპონგსანტი და მთავარი საოპერაციო ოფიცერი პოლ ოლდრიჯი ესწრებოდნენ, მესაკუთრის წარმომადგენელმა ემოციურად წარმოთქვა ფრაზა "Yes, yes, yes! Very messy, messy, it's getting messy!" (დიახ, დიახ, დიახ! ძალიან არეული სიტუაციაა, არეული, ძალიან არეული!).
კუკის თქმით, მან ეს ფრაზა გაიგო, როგორც "We've got to get Messi" (ჩვენ მესი უნდა გავიფორმოთ). სწორედ ამიტომ, მან "ბარსელონას" შეთავაზება გაუგზავნა, რომელიც მესის 70 მილიონ ფუნტად ყიდვას ითვალისწინებდა.
ეს ის პერიოდია, როდესაც სარეკორდო ტრანსფერი ჯერ კიდევ ზიდანის "რეალში" 77 მილიონ ევროდ (დაახლოებით 65 მილიონი ფუნტი) გადასვლაა. ანუ, "მანჩესტერ სიტი", შეცდომით, ახალი რეკორდის დამყარებას შეეცადა.
The Athletic-თან საუბრისას, გარი კუკი ყვება, თუ რა მოხდა შემდეგ: "მომდევნო დღეს, პრემიერ ლიგიდან დეივ რიჩარდსმა დამირეკა და მკითხა: "გარი, შენ გააკეთე შეთავაზება ლიონელ მესიზე? 70 მილიონი ფუნტი? გაგიჟდი?"
როგორც ჩანს, "ბარსელონამ" ეს შეთავაზება სერიოზულად მიიღო: "რიჩარდსმა მითხრა, რომ მას "ბარსელონადან" დაუაკვშირდნენ და ჰკითხეს, რეალური იყო თუ არა ეს შეთავაზება. მათ დეივს უთხრეს, რომ თუ ეს რეალურია, მათ შეეძლოთ შეთანხმებისთვის რამდენიმე კვირით ადრეც მიეღწიათ."
საბედნიეროდ, გაუგებრობა გაუგებრობადვე დარჩა და მოლაპარაკებებს სერიოზული სახე არ მისცემია.
ამ სიახლეზე კომენტარები გათიშულია.
კომენტარები [ 7 ]