კაზემიროს "ელ კლასიკოს" გამოტოვება ისევ ემუქრება
ლა ლიგის მე-16 ტურში, "ესპანიოლთან" დღეს გამართულ შეხვედრაში (2-0), მადრიდის "რეალის" ნახევარმცველმა, კაზემირომ, ყვითელი ბარათი არ მიიღო, ეს კი იმას ნიშნავს, რომ ბრაზილიელ ნახევარმცველს "ელ კლასიკოს" გამოტოვება კვლავ ემუქრება.
კაზემიროს, "ელ კლასიკომდე" ერთი ტურით ადრე, ლა ლიგაში 4 ყვითელი ბარათი აქვს. ეს ნიშნავს, რომ 15 დეკემბერს, "ვალენსიასთან" სტუმრად გასამართ სავარაუდოდ რთულ მატჩში, ზიდანმა ან ბრაზილიელი უნდა დაასვენოს, ან გარისკოს. გარისკვის შემთხვევაში, თუ კაზემირო "მესტალიაზე" გააფრთხილეს, ის 3 დღეში გასამართ "კლასიკოს" გამოტოვებს.
საინტერესოა, რომ 26 ოქტომბერს გასამართი "ელ კლასიკოს" წინაც კაზემირო მსგავსი პრობლემის წინაშე იდგა. თუ ის "მალიორკასთან" გაფრთხილებას მიიღებდა, "ბარსელონას" წინააღმდეგ ვერ ითამაშებდა. თუმცა, ბრაზილიელს სექტემბრის დასაწყისში "ვილიარეალთან" მიღებული ყვითელი ბარათი მოუხსნეს. მე-4 გაფრთხილება კაზემირომ მაინც მიიღო და ახლა მას უკვე გადატანილი "ელ კლასიკოს" გამოტოვება ემუქრება.
ამ სიახლეზე კომენტარები გათიშულია.
კომენტარები [ 8 ]