France Football-ის ჟურნალისტის "მინიშნება" "ოქროს ბურთზე"
France Football-ის ჟურნალისტი არნო ტულიპიე, "ოქროს ბურთის" დაჯილდოებასთან დაკავშირებით, საინტერესო განცხადებას აკეთებს.
"ოქროს ბურთის" გამარჯვებულს სწორედ France Football ავლენს. 2019 წლის საუკეთესო ფეხბურთელის გამოსავლენად ხმის მიცემა დასრულებულია, რაც იმას ნიშნავს, რომ გამარჯვებული გამოვლენილია, საზოგადოებისთვის კი ის ცნობილი 2 დეკემბერს გახდება.
შესაძლოა, არნო ტულიპიე ერთ-ერთი მათგანი იყოს, რომელმაც გამარჯვებულის ვინაობა უკვე იცის. ამის გათვალისწინებით, მისი ყველა კომენტარი საინტერესოა.
"ბევრი მცველი არაა, რომელსაც "ოქროს ბურთი" მოუგია. სამწუხაროდ, ფეხბურთში, ჩვენ გვაჩვენებენ 10 საუკეთესო გოლს, მაგრამ ვერ ვხედავთ მცველების 10 საუკეთესო ართმევას." - ციტირებს ტულიპიეს სიტყვებს France Bleu.
რთული სათქმელია, ტულიპიეს ეს სიტყვები წუხილია იმის გამო, რომ მცველმა "ოქროს ბურთი" ვერც ამჯერად მოიგო, თუ ის მისთვის უსიამოვნო ტრადიციის დარღვევაზე მიგვანიშნებს.
2019 წლის "ოქროს ბურთის" მოგების მთავარი კანდიდატები ლიონელ მესი და ვირჯილ ვან დაიკი არიან. ჰოლანდიელ მცველს შანსი აქვს 2006 წლის შემდეგ პირველი უკანახაზელი გახდეს, რომელიც ამ ჯილდოს მოიგებს. 13 წლის წინ საუკეთესოდ იტალიელი ფაბიო კანავარო დაასახელეს.
ამ სიახლეზე კომენტარები გათიშულია.
კომენტარები [ 12 ]