"ნაპოლი" ფაბიან რუისის "ბარსელონასა" და "რეალისგან" დაცვას ცდილობს
იტალიურ პრესაში გავრცელებული ინფორმაციის თანახმად, "ნაპოლი" გუნდის ესპანელი ნახევარმცველის, ფაბიან რუისის შესანარჩუნებლად მზადაა ფეხბურთელს ახალი კონტრაქტი შესთავაზოს.
Mundo Deportivo-ს ცნობით, მომდევნო ზაფხულში, 23 წლის შუახაზელი "ბარსელონას" პრიორიტეტი იქნება. ფაბიან რუისს თვალი დაადგა "რეალმაც", რომელიც ესპანელს პოლ პოგბასა და კრისტიან ერიკსენის ალტერნატივად განიხილავს.
Corriere dello Sport-ის ჟურნალისტების ინფორმაციით, ნეაპოლელთა პრეზიდენტს, აურელიო დე ლაურენტისს სურს, რომ კლუბი "ბარსელონასა" და "რეალის" "შეტევებისგან" დაზღვეული იყოს. "ნაპოლი" ფაბიან რუისს ახალ კონტრაქტს სთავაზობს, რომელშიც, "ბარსელონასთვის" და "რეალისთვის", გამოსასყიდ თანხად 120 მილიონი ევრო ჩაიდება. ამ ხელშეკრულების გაფორმების შემთხვევაში, ფაბიან რუისის გამოსასყიდი თანხა, იტალიის სერია A-ში, მე-2 იქნება მისივე თანაგუნდელის, კალიდუ კულიბალის შემდეგ (200 მილიონი).
თუ ფაბიან რუისი კონტრაქტის გახანგრძლივებას დასთანხმდება, მისი ხელფასი, რომელიც ახლა წელიწადში 2 მილიონ ევროს შეადგენს, მნიშვნელოვნად გაიზრდება.
ფაბიან რუისი "ნაპოლიში" მე-2 სეზონს ატარებს. იტალიური გუნდის მაისურით მან 45-ჯერ ითამაშა და 8 გოლი გაიტანა.
ამ სიახლეზე კომენტარები გათიშულია.
კომენტარები [ 4 ]