ივან რაკიტიჩი: რონალდუმ დამირეკა და "იუვენტუსში" გადასვლა შემომთავაზა
"ბარსელონას" ხორვატი ნახევარმცველი ივან რაკიტიჩი საინტერესო განაცხადებას აკეთებს. 31 წლის ფეხბურთელი ადასტურებს, რომ გასულ ზაფხულში "იუვენტუსში" გადასვლის შანსი ჰქონდა და მეტიც, აცხადებს, რომ მას ტურინულ კლუბში პირადად კრიშტიანუ რონალდუ იწვევდა.
"კრიშტიანუ რონალდუმ დამირეკა და "იუვენტუსში" გადასვლა შემომთავაზა. თუმცა, "ბარსელონა" 50 მილიონ ევროს ითხოვდა და ტრანსფერი არ შედგა." - განაცხადა რაკიტიჩმა ხორვატულ 24sata-სთან ინტერვიუს დროს.
რაკიტიჩმა მომავალზეც ისაუბრა: "არ ვიცი, რა იქნება მომავალში. სიტუაცია რთულია, რადგან მინდა ვითამაშო და არა უბრალოდ გუნდის წევრი ვიყო. სიტუაციის შესაცვლელად ყველაფერს გავაკეთებ. კლუბთან კონტრაქტი კიდევ 2 წლით მაკავშირებს და სათამაშოდ "ბარსელონაზე" უკეთესი გუნდი არ არსებობს. ეს მსოფლიოს საუკეთესო კლუბია, მაგრამ თამაში მინდა და არა მხოლოდ ქალაქსა და სანაპიროზე სეირნობა.
კლუბში ხალხს ვესაუბრე. ყველა იცოდა, რომ შემოთავაზებები მქონდა. მინდა ბოლომდე ვიბრძოლო. გუნდში ხედავენ, რომ მზად ვარ ეს მოედანზე ვაჩვენო. გულშემატკივრებს მხარდაჭერისთვის მადლობას ვუხდი, მაგრამ თუ არაფერი შეიცვალა, მოგვიწევს დავსხდეთ და ჩემს სიტუაციაზე კიდევ ერთხელ ვისაუბროთ."
გასულ წლებში, ივან რაკიტიჩი შეუცვლელი ფიგურა იყო როგორც ლუის ენრიკესთვის, ასევე ერნესტო ვალვერდესთვის. თუმცა, ფრენკი დე იონგის მოსვლის შემდეგ, ხორვატმა სათადარიგოთა სკამზე გადაინაცვლა.
ამ სიახლეზე კომენტარები გათიშულია.
კომენტარები [ 9 ]