ხვალ ნეიმარისა და "ბარსელონას" სასამართლო გაიმართება
"ბარსელონასთვის" ნეიმარი და ნეიმარისთვის "ბარსელონა" აქტუალობას არ კარგავენ. სანამ ბრაზილიელის მორიგი სატრანსფერო საგა დაიწყება, ის კატალონიურ კლუბთან ურთიერთობას სასამართლოში გაარკვევს.
როდესაც ნეიმარმა "ბარსელონა" დატოვა, კატალონიურმა კლუბმა მას ბონუსის სახით 26 მილიონი ევროს გადახდაზე უარი უთხრა. ეს ის თანხაა, რომელიც ბრაზილიელს კატალონიელებთან ახალი კონტრაქტის გაფორმების სანაცვლოდ უნდა მიეღო, მაგრამ ვინაიდან ნეიმარმა კლუბი კონტრაქტის ვადის ამოწურვამდე დატოვა, "ბლაუგრანამ" ამ თანხის გადახდა საჭიროდ არ მიიჩნია. ნეიმარის აზრით, ამ თანხას პირგასამტეხლოები დაემატა და ახლა ის კლუბისგან 44 მილიონ ევროს ითხოვს.
სასარჩელო მოთხოვნა აქვს დაყენებული "ბარსელონასაც" - კატალონიელები ნეიმარისთვის გადახდის თანხის ნაწილის, კონკრეტულად კი 20 პროცენტის დაბრუნებას ითხოვენ. მიზეზი ამ შემთხვევაშიც ისაა, რომ ნეიმარმა კონტრაქტით გათვალისწინებული ვალდებულებები ბოლომდე არ შეასრულა და ხელშეკრულება გაწყვიტა.
სასამართლო ხვალ, 27 სექტემბერს გაიმართება. Sport-ის ცნობით, მას არ დაესწრება ჟოზეპ მარია ბართომეუ. სავარაუდოდ, პროცესზე არ იქნება არც ნეიმარი. ბრაზილიელ ფეხბურთელს სასამართლოში მისი მამა წარმოადგენს.
ამ სიახლეზე კომენტარები გათიშულია.
კომენტარები [ 5 ]