კოუტინიოთი "ბაიერნი" და "იუვენტუსი" დაინტერესდნენ
ფილიპე კოუტინიოს "ბარსელონადან" წასვლა უნდა, მაგრამ არა "ტოტენჰემში" - ამ სათაურით სტატიას Sport ავრცელებს.
წყაროს ცნობით, ბრაზილიელი ფეხბურთელი "ბარსელონას" თვის ბოლომდე დატოვებს, მაგრამ ის ინგლისში არ დაბრუნდება.
კოუტინიო "ტოტენჰემში" გადასვლასთან ახლოს იყო, მაგრამ ლონდონელებმა ფინანსური დეტალები ბოლო მომენტში შეცვალეს და მოლაპარაკება ჩაიშალა. ამას ისიც ემატებოდა, რომ "დეზებში" გადასვლის დიდ სურვილს არც თავად ფეხბურთელი იჩენდა. ინგლისში სატრანსფერო ფანჯარა დღეს იხურება და თუ რამე გაუთვალისწინებელი არ მოხდა, კოუტინიო ნისლიან ალბიონზე არ გადავა.
იმ შემთხვევაში, თუ "ბარსელონა" ნეიმარს დაიბრუნებს, კატალონიელებს კოუტინიოს გაშვება აუცილებლად მოუწევთ, რადგან კლუბს ორივე ფეხბურთელის ხელფასის გადახდა არ შეუძლია. საუბარია კოუტინიოს იჯარით გაშვებაზე, მაგრამ პრობლემას ის ქმნის, რომ მისი ხელფასის გადახდა ბევრ გუნდს არ შეუძლია.
ბრაზილიელის გარშემო შექმნილ ვითარებას მიუნხენის "ბაიერნი" და ტურინის "იუვენტუსი" აკვირდებიან. ამ ეტაპზე, 27 წლის ფეხბურთელით მხოლოდ ეს კლუბები არიან დაინტერესებულნი.
ამ სიახლეზე კომენტარები გათიშულია.
კომენტარები [ 8 ]