"ატლეტიკოს" პრეზიდენტი: "ბარსელონადან" არავინ დაგვკავშირებია
მადრიდის "ატლეტიკოს" პრეზიდენტი ენრიკე სერესო აცხადებს, რომ ანტუან გრიზმანის ტრანფერთან დაკავშირებით მისი კლუბისთვის "ბარსელონადან" არავის მიუმართავს.
გრიზმანის ტრანსფერის შესახებ არაერთი ინფორმაცია ვრცელდება. ზოგი ცნობით, ფრანგის კატალონიურ კლუბში გადასვლა უკვე გადაწყვეტილია და "ბლაუგრანა" 1 ივლისს ელოდება, როდესაც ფეხბურთელის გამოსასყიდი თანხა 120 მილიონ ევრომდე შემცირდება. ასევე ვრცელდება ინფორმაცია, რომ "ბარსელონას" ლიდერების უარყოფითი რეაქციის გამო, კატალონიელები გრიზმანის ტრანსფერის გაუქმებაზე დაფიქრდნენ. ზოგი წყაროს ცნობით კი, "ბარსელონა" "ატლეტიკოსთან" მოლაპარაკებას აწარმოებს იმისათვის, რომ კლუბები 120 მილიონი ევროს პირდაპირ გადახდაზე შეთანხმდნენ და "ბარსას" გამოსასყიდი თანხის გადახდა არ მოუხდეს. ასეთ შემთხვევაში, "ბლაუგრანა" დამატებით გადასახადებს თავიდან აირიდებს.
ამ ბოლო ინფორმაციას "ატლეტიკოს" პრეზიდენტი უარყოფს: "გრიზმანის ტრანსფერთან დაკავშირებით "ბარსელონადან" არავინ დაგვკავშირებია." - განაცხადა ენრიკე სერესომ Onda Ceros-ს ეთერში.
ამ სიახლეზე კომენტარები გათიშულია.
კომენტარები [ 4 ]