ვინ იქნება ჟორდი ალბას შემცვლელი მომდევნო სეზონში?
მარცხენა მცველის პოზიცია "ბარსელონაში" ერთადერთია, რომელზე თამაშიც მაღალ დონეზე მხოლოდ ერთ ფეხბურთელს შეუძლია და რამდენიმე მცდელობის მიუხედავად, მთავარმა მწვრთნელმა ჟორდი ალბას არყოფნის დროს მისი სხვა მოთამაშით წარმატებით ჩანაცვლება ვერ მოახერხა.
ასე რომ, კატალონიელებისთვის ამ პოზიციის გაძლიერება აუცილებელია და კლუბმა ამაზე ზაფხულშივე უნდა იზრუნოს.
Sport-ის ინფორმაციით, "ბარსას" ხელმძღვანელებს ასეთი გეგმა აქვთ: ისინი მარკ კუკურელიას გაყიდიან, ჟუან მირანდას გაანათხოვრებენ და ორი წლით სხვა კლუბის გამოცდილ ფეხბურთელს შეიძენენ.
"ბარსელონას" უკვე უკავშირებენ "ატლეტიკოს" მცველ ფილიპე ლუისს, "არსენალის" ნაჩო მონრეალს და "ლივერპულის" ალბერტო მორენოს.
ერთ-ერთი მათგანი სათადარიგო მარცხენა მცველი ორი სეზონის განმავლობაში იქნება, რის შემდეგაც გუნდს მირანდა დაუბრუნდება, რომელსაც გამოცდილება უკვე მიღებული ექნება და ალბას შეცვლასაც შეძლებს.
მირანდას გაშვების შემთხვევაში, საჭირო იქნება "ბარსა ბ"-ს დანაკლისის შევსებაც, ამისთვის კი კატალონიური კლუბი, სავარაუდოდ, 20 წლის ბრაზილიელ ფეხბურთელს, ლუან კანდიდოს შეიძენს, რომელიც "პალმეირასის" წევრია.
ამ სიახლეზე კომენტარები გათიშულია.
კომენტარები [ 10 ]