"ჟირონა" - "ბარსელონა". საინტერესო ფაქტები

ხვალ, თბილისის დროით 19 საათსა და 15 წუთზე, "ბარსელონა" ლა ლიგაში სტუმრად "ჟირონას" დაუპირისპირდება. ხვალინდელი შეხვედრა "ესტადი მონტილივზე" გაიმართება, ახლა კი გთავაზობთ, ამ ორი გუნდის დაპირისპირების საინტერესო ფაქტებს. 

• მიუხედავად "ჟირონას" 88 წლიანი არსებობისა, კატალონიური კლუბები ერთმანეთს მხოლოდ მეხუთედ შეხვდებიან, წინა ოთხ შეხვედრაში სამ შემთხვევაში გამარჯვება "ბარსელონამ" მოიპოვა, ხოლო ერთხელაც გუნდებმა ფრე ითამაშეს (2:2)
  
  
• "ბარსელონა" და "ჟირონა" ერთმანეთს პირველად 2011 წლის 8 აგვისტოს შეხვდნენ, "ბლაუგრანამ" გადახალისებული შემადგენლობით მინიმალური სხვაობით იმარჯვა (2:1) 
  
  
• "ჟირონას" მთავარი მწვრთნელი, ეუსებიო საკრისტანი, "ბარსელონაში" საკმაოდ ნაცნობი პერსონაა, სპეციალისტი თავდაპირველად გუნდის ფეხბურთელი გახლდათ, 1988-1995 წლებში, შემდეგ ფრენკ რაიკაარდის შტაბის წევრი (2003-2008), 2011-2015 წლებში კი "ბარსელონა ბ"-ს მთავარი მწვრთნელი. 
  
  
• "ბარსელონას" მოთამაშეებიდან "ჟირონას" კარში ყველაზე მეტი გოლი - ლუის სუარესმა და ლიონელ მესიმ (4) გაიტანეს
  
  
• მიმდინარე სეზონში "ბლაუგრანამ" სტუმრად 9 შეხვედრა ჩაატარა, აქედან 6-ჯერ გამარჯვება მოიპოვა, 2-ჯერ ფრე, ერთხელ კი დამარცხდა. გასვლაზე მატჩებში დაფიქსირებული შედეგით, ამ მომენტში "ბარსელონას" ლა ლიგაში საუკეთესო მაჩვენებელი აქვს
  
  
• გუნდებმა ბოლო მატჩები სამეფო თასზე ჩაატარეს, ორივე კატალონიურმა კლუბმა მარცხი იწვია, "ბლაუგრანა" სტუმრად "სევილიასთან" დამარცხდა (0:2), "ჟირონა" კი "სანტიაგო ბერნაბეუზე" მადრიდის "რეალთან" (2:4) 
  
  
• "ჟირონა" დაარსების დღიდან, ესპანეთის უმაღლესი რანგის დივიზიონში მეორე სეზონს ატარებს, წინა სეზონში კლუბმა მე-10 ადგილი დაიკავა და ძალიან ახლოს იყო ევროტურნირის საგზურთან, მიმდინარე სეზონში კი ეუსებიოს გუნდი 20 ტურის შემდეგ მე-12 ადგილზე იმყოფებიან