"ბარსელონამ" საერთაშორისო ჩემპიონთა თასის ტიტული დათმო

რამდენიმე წუთის წინ დასრულდა ამხანაგური შეხვედრა "ბარსელონასა" და "რომას" შორის, რომელიც საერთაშორისო ჩემპიონთა თასის ეგიდით გაიმართა.

"ბარსელონა", რომელიც უპირატესობას თითქმის მთელი თამაშის განმავლობაში ფლობდა, ბოლო წუთებზე ახალგაზრდა ფეხბურთელების მიერ დაშვებული ინდივიდუალური შეცდომების გამო დამარცხდა.

ანგარიში მალკომი-მუნირი-რაფინიას ლამაზი კომბინაციისა და რაფინიას ეფექტური დარტყმის შემდეგ გაიხსნა. "რომამ", პირველივე ტაიმში, ელ შაარავის ზუსტი დარტყმით გაათანაბრა,

49-ე წუთზე, "ბარსელონა" კვლავ წინ გავიდა - თავი "რომასთვის" "წართმეულმა" მალკომმა გამოიჩინა.

შეხვედრის ბედი 7-წუთიან მონაკვეთში გადაწყდა - 78-ედან 85-ე წუთამდე, გოლები ფლორენციმ, კრისტანტემ და პეროტიმ გაიტანეს და "რომამ" 4:2 მოიგო.

ამ წაგების შემდეგ, "ბარსელონა" საერთაშორისო ჩემპიონთა თასის გამარჯვებულის წოდების შენარჩუნებას ვერ შეძლებს. კატალონიელებს, 2 თამაშში, 2 ქულა აქვთ, პირველ ორ საფეხურზე მყოფ "ტოტენჰემსა" და "დორტმუნდს" კი - 7-7. ვალვერდეს გუნდს ერთი თამაში აქვს დარჩენილი და ის ლიდერებს ვეღარ დაეწევა.