ინიესტა - მე-6 "ბარსელონელი", რომელიც სათამაშოდ იაპონიაში წავიდა
დღეს დილით ოფიციალურად დადასტურდა, რომ ანდრეს ინიესტა კარიერას "ვისელ კობეში" გააგრძელებს. ანდრესი მე-6 "ბარსელონელი" იქნება, რომელიც იაპონიაში ითამაშებს. აქამდე კატალონიურ გუნდში გატარებული სეზონების შემდეგ ამომავალი მზის ქვეყნის კლუბებს 4 მოთამაშე და ერთი სამწვრთნელო შტაბის წევრიი შეუერთდა, მათ შორის მიხაელ ლაუდრუპი და ჩიკი ბეგირისტაინი.
მიკაელ ლაუდრუპი "ბარსელონას" წევრი 1989-94 წლებში იყო. კლუბის დატოვების შემდეგ ის "რეალში" გადავიდა, მადრიდული კლუბის შემდეგ კი იაპონურ "ვისელ კობეში". მან ამ გუნდში 1996/97 წლების სეზონი გაატარა.
ლაუდრუპის შემდეგ აზიაში ბედი ჩიკი ბეგირისტაინმა სცადა, რომელმაც "ბარსელონა" 1995 წელს დატოვა. ამის შემდეგ მან ლა კორუნიის "დეპორტივოს" მიაშურა, ორი წლის შემდეგ კი, 33 წლის ასაკში, "ურავა რედ დაიმონდსს" შეუერთდა, სადაც 2 სეზონი დაჰყო.
ხულიო სალინასი "ბარსელონაში" ლაუდრუპთან და ბეგირისტაინთან ერთად, 1988-94 წლებში გამოდიოდა. შემდეგ ისიც "დეპორტივოში" გადავიდა, ერთი სეზონის შემდეგ კი - იაპონიაში, "იოკოჰამა მარინოსში" განაგრძო კარიერა. ის მაშინ 35 წლის იყო. ერთი სეზონის შემდეგ, სალინასი ესპანეთში დაბრუნდა და კარიერა "ალავესში" დაასრულა.
იონ ანდონი გოიკოეჩეა "ბარსელონას" წევრი ზემოთ ჩამოთვლილი ფეხბურთელების დროს იყო და მათ მსგავსად, იაპონიაში არც ისე დიდი დრო გაატარა. ის 1998 წელს, 32 წლის ასაკში "იოკოჰამაში" გადავიდა და აქ ერთი წელი გაატარა.
კარლეს რეშაკმა "ბარსელონას" თითქმის მთელი თავისი საფეხბურთო კარიერა დაუკავშირა. ის ფეხბურთელის რანგში "ბლაუგრანას" წევრი 1965-81 წლებში იყო, სხვადასხვა ასაკობრივ გუნდებს კი სათავეში 14 წლის განმავლობაში ედგა. გამონაკლისი 1998 წელი იყო, როცა ბობი რობსონმა და ჟოზე მოურინიომ მას ფუნქციები შეუზღუდეს და სკაუტობამდე დააქვეითეს. მაშინ, მან კატალონიის დატოვება გადაწყვიტა, იოკოჰამაში გადაბარგდა და "ფლუგელსს" ჩაუდგა სათავეში. მოგვიანებით, ეს კლუბი "მარინოსთან" გაერთიანდა, რეშაკი კი "ბარსელონაში" დაბრუნდა, რადგან ლუი ვან გაალმა მისი სამწვრთნელო შტაბში ყოფნა ხელახლა ჩათვალა საჭიროდ.
ამ სიახლეზე კომენტარები გათიშულია.
კომენტარები [ 9 ]