ლუის სუარესი "ბარსელონას" ყველა დროის მე-6 საუკეთესო ბომბარდირი გახდა

მოგეხსენებათ, რომ "ბარსელონას" ურუგვაელმა ფორვარდმა, ლუის სუარესმა "ჟირონასთან" გამართულ დერბიში ჰეთ-თრიქი შეასრულა და თავისი 144-ე გოლი გაიტანა კატალონიელთა მაისურით.

ალბათ იცით, რომ მიმდინარე სეზონში ურუგვაელმა შემტევმა "ბარსელონაში" გატანილი გოლების რაოდენობით სამუელ ეტო'ოს გაასწრო და მე-7 პოზიციაზე გადავიდა, ამის შემდეგ დიდი ხანი არ დასჭირვებია პაულინიო ალკანტარას უკან ჩამოსატოვებლად.

"ლურჯ-ბროწეულისფერთა" ფილიპინელ ლეგენდას კატალონიურ გრანდში 143 ოფიციალური გოლი აქვს გატანილი, ლუის სუარესმა კი, როგორც ზემოთ მოგახსენეთ, დღეს თავისი 144-ე გაიტანა და პაულინიო ჩამოიტოვა.

თუ არაოფიციალურ გოლებს გავითვალისწინებთ, აქ უკვე პაულინიო ალკანტარა 31 წლის ურუგვაელს ბევრად ჯაბნის, ფილიპინელის ანგარიშზე 369 გოლია, ხოლო სუარესის აქტივში მხოლოდ 151-ია.

ოფიციალურ მატჩებში გატანილი გოლების მიხედვით "ბარსელონას" ყველა დროის ბომბარდირთა სია ასე გამოიყურება: ლეო მესი (537), სეზარი (232), ლასლო კუბალა (194), ხოსეპ სამიტიერი (184), ხოსეპ ესკოლა (167), ლუის სუარესი (144).