მესიმ საკუთარი, უცნაური რეკორდი გაიმეორა

ლიონელ მესი არაერთი რეკორდის შემოქმედია, რომელთაგან ზოგი უცნაური და სახალისოა. ერთ-ერთი მათგანია სეზონის განმავლობაში ბურთის ძელისთვის მორტყმა.

"ეიბართან" დღეს გამართულ შეხვედრაში, რომელიც "ბარსამ" 2:0 მოიგო, არგენტინელმა ბურთი ძელს კიდევ ერთხელ მოარტყა. ლა ლიგის მიმდინარე გათამაშებაში ეს უკვე მეთოთხმეტედ მოხდა.

მას შემდეგ, რაც მსგავს სტატისტიკას ითვლიან, ანუ 2003 წლიდან, ლა ლიგის ერთ გათამაშებაში ბურთის ძელისთვის 14-ჯერ მოხვედრება რეკორდია. საინტერესოა, რომ ეს რეკორდი აქამდეც ლეოს ეკუთვნოდა, რომელმაც თავისივე შედეგი გაიმეორა.

წინ კიდევ 14 თამაშია და მესი, დიდი ალბათობით, 2011/12 წლების სეზონში მის მიერ ნაჩვენებ შედეგს გააუმჯობესებს.