ისტორია გვეუბნება: ლა ლიგაში 10 ქულის აღმოფხვრა და გეჩემპიონება შეუძლებელია

ესპანეთის ჩემპიონატის ისტორიაში არასდროს მომხდარა, რომ გუნდს 10-ქულიანი ჩამორჩენა აღმოეფხვრას და ჩემპიონი გამხდარიყოს. ამ ინფორმაციას Sport ავრცელებს.

პრიმერას 12 ტურის შემდეგ, "ბარსელონა" მის უმთავრეს კონკურენტს, მადრიდის "რეალს" 10 ქულით უსწრებს. "სამეფო კლუბის" წარმომადგენლები ჩემპიონობის იმედს არ კარგავენ, მაგრამ ისტორია მათ წინააღმდეგაა.

როგორც ირკვევა, აქამდე არასდროს მომხდარა, რომ გუნდი, რომელიც სეზონის განმავლობაში ლიდერს 10 ქულით ჩამორჩებოდა, ჩემპიონი გამხდარიყოს.

ლა ლიგას ქულათა უფრო დიდი სხვაობით აღმოფხვრა ახსოვს. მაგალითად, 2003/2004 წლების სეზონში, "ბარსელონამ" "რეალს" 18 ქულა ამოუქაჩა. თუმცა, იმ წელს, კატალონიელები ჩემპიონები ვერ გახდნენ. თასი "ვალენსიამ" დაისაკუთრა, რომელიც ჩემპიონობისთვის ახლაც იბრძვის - მე-2 ადგილზე მყოფი "ღამურები" "ბარსელონას" 4 ქულით ჩამორჩებიან და კვირას სწორედ კატალონიურ კლუბს მასპინძლობენ.