მაროკოს ფეხბურთის ფედერაცია ესპანელებს მუნირის გამო უჩივის
მაროკოს ფეხბურთის ფედერაცია აპირებს ესპანეთის ფეხბურთის ფედერაციას, მუნირ ელ ჰადადის საკითხის თაობაზე, სპორტულ საარბიტრაჟო სასამართლოში უჩივლოს.
ამჟამად "ალავესში" მოთამაშე მუნირს, რომელიც კვლავ "ბარსელონას" საკუთრებაა, მაროკოული ფესვები აქვს. ამის მიუხედავად, მან ნაკრებებს შორის ესპანეთი აირჩია და 2014 წელს, ევროპის ჩემპიონატის შესარჩევ ეტაპზე, "ფურია როხას" მაისურით ერთი შეხვედრა ჩაატარა კიდეც.
მას შემდეგ, მუნირს ესპანეთის ნაკრებში არ იძახებენ. ფეხბურთელის თავის გუნდში ხილვის სურვილი მაროკოს ფეხბურთის ფედერაციამ გამოთქვა და როგორც ცნობილია, მშობლიური ქვეყნის სახელით თამაში თავად მუნირსაც სურს. თუმცა, მოვლენების ასეთი განვითარების წინააღმდეგია ესპანეთი და 22 წლის ფეხბურთელს მაროკოს ნაკრების მაისურით თამაშის უფლებას არც FIFA აძლევს.
Marca-ს ცნობით, მუნირის სანაკრებო მომავალი სპორტულ საარბიტრაჟო სასამართლოში გაირკვევა, რომელსაც მაროკოს ფეხბურთის ფედერაცია მიმართავს. მაროკოელებს სურთ, რომ ფეხბურთელი მსოფლიოს 2018 წლის განაცხადში შეიყვანონ.
ამ სიახლეზე კომენტარები გათიშულია.
კომენტარები [ 5 ]