ჟერემი მატიე: თუ "ბარსელონას" გავუტან, ბართომეუსა და ფერნანდესის გამო აღვნიშნავ
ზეგ, 27 სექტემბერს, "ბარსელონა", ჩემპიონთა ლიგის ჯგუფური ეტაპის მე-2 ტურში ჟერემი მატიეს "სპორტინგს" დაუპირისპირდება.
33 წლის ფრანგი მცველი "ბარსელონაში" 3 წლის განმავლობაში თამაშობდა და ის ლისაბონში გასულ ზაფხულში გადავიდა. ცოტა ხნის წინ, Marca-მ მატიესთან ინტერვიუ ჩაწერა, რომლიდანაც იმ მონაკვეთებს შემოგთავაზებთ, რომლებიც "ბარსელონას" ეხება.
- "სპორტინგში" ოფიციალურად გადასვლამდე ამ გუნდში ვარჯიშობდი. ეს გამოსაცდელი პერიოდი იყო?
- არა, ეს "ბარსელონას" პრობლემას უაკვშირდებოდა, რომელმაც საბუთების წესრიგში მოყვანა დააგვიანა. ოფიციალური განცხადება მოგვიანებით გავრცელდა, მაგრამ ეს არ ნიშნავს, რომ "სპორტინგში" გამოსაცდელი პერიოდი მქონდა.
- იგრძნობა, რომ ახალ კლუბში უფრო მნიშვნელოვანი როლი გაკისრია. ჯარიმებსაც კი ურტყამ...
- კი, ასეა. ვფიქრობ, ეს ნორმალურია, რადგან "ბარსელონაში" მსოფლიოს საუკეთესო ფეხბურთელები თამაშობდნენ. როდესაც ამ გუნდში ვიყავი, ვცდილობდი, თავი საუკეთესოდ წარმომეჩინა. ბევრი შეხვედრა ჩავატარე და ვეცადე კარგად მეთამაშა.
პირველი 2 სეზონი ფანტასტიკური იყო, მესამე კი ნაკლებად, მაგრამ ასეთია ფეხბურთი.
- "ბარსელონა" ცუდად ხომ არ გაგონდება?
- არა. ბევრი ვითამაშე, მოვიგე ტიტულები... ერთადერთი გულდასაწყვეტი ისაა, რომ ხალხი ამბობდა, თითქოს ბევრს არ ვთამაშობდი. არადა, პირველ სეზონში მონაწილეობა მატჩების 58%-ში მივიღე და მნიშვნელოვანი გოლებიც გავიტანე. მეორე სეზონში ნაკლები ვითამაშე: 53-54%, რაც ასევე არაა ცუდი შედეგი. ბოლო სეზონი კი, ტრავმებისა და მწვრთნელისგან ნდობის ნაკლებობის გამო, წარუმატებელი გამოდგა.
- "ბარსელონაში" მეგობრები გყავს?
- მათ მეგობრებს ვერ ვუწოდებ. უფრო კოლეგებს. ჩემთვის ფანტასტიკური იყო გასახდელში ასეთ ფეხბურთელებთან ერთად ყოფნა. მირჩევნია, კლუბში კოლეგები მყავდეს, ვიდრე მეგობრები. მეგობრობა უფრო მნიშვნელოვანი რამაა.
- ანუ, თამაშის წინ, "ბარსელონას" ფეხბურთელების მხრიდან ზარს არ ელი. ვისთან ატარებდი ყველაზე მეტ დროს "ბარსას" მოთამაშეებიდან?
- განსაკუთრებით ბევრს არავისთან. ურთიერთბა ყველასთან მქონდა, მაგრამ მოედანს მიღმა მეოჯახე ადამიანი ვარ და მირჩევნია დრო შვილებთან და მეუღლესთან გავატარო.
- როგორია "ბარსელონა" ნეიმარის გარეშე?
- ამ გუნდმა კარგი შედეგები აჩვენა და მას ჰყავს ფეხბურთელი, რომელიც მოედანზე სხვაობას ქმნის: მესი.
- თუ "ბარსელონას" გაუტან, აღნიშნავ გოლს?
- არ ვიცი. ყოფილ თანაგუნდელებსა და გულშემატკივრებს დიდ პატივს ვცემ. თუ აღვნიშნავ, ამას ბართომეუსა და ფერნანდესის გამო გავაკეთებ. ვფიქრობ, ისინი ძალიან ცუდად მექცეოდნენ.
- ფიქრობ, რომ მათ გარდა, შენ მიმართ პრესაც უსამართლო იყო?
- მთელი პრესა, არა მხოლოდ Sport. ყოველთვის, როცა ვთამაშობდი, ჟურნალისტები ჩემზე ცუდს წერდნენ. ფეხბურთი გუნდური თამაშია და როდესაც გუნდი აგებს, ეს მხოლოდ ერთი ადამიანის ბრალი არასდროსაა. ეს ჩემი აზრია.
"იუვენტუსთან" თამაშის გამეორებას ვუყურე. მართალია, რომ გოლების დროს, მეტოქისთვის ბურთის ართმევას ვერ ვახერხებდი, მაგრამ ამის შემდეგ კეთდებოდა პასი და არავინ კითხულობდა, რას აკეთებდნენ ამ დროს პიკე ან მასკერანო.
ამ სიახლეზე კომენტარები გათიშულია.
კომენტარები [ 9 ]