Sport.es: 2017 წლის ზაფხულში "ბარსა" "ლივერპულს" 65 მლნ ფუნტს შესთავაზებს

"ბარსელონას" სამწვრთნელო შტაბი, ლუის ენრიკეს მეთაურობით კვლავ ინტერესდება "ლივერპულის" ბრაზილიელი ნახევარმცველით, ფილიპე კოუტინიოთი, იტყობინება Sport.es.

წყაროს ინფორმაციით, კატალონიური კლუბის წარმომადგენელი ბრაზილია-არგენტინის მატჩს დაესწრო (3:0), რათა დაკვირვებოდა, თუ როგორი ურთიერთობა ჰქონდა კოუტინიოს მის თანამემამულესთან, ნეიმართან, რომელიც "ბარსელონას" რიგებში ირიცხება. წყარო იტყობინება, რომ 2017 წლის ზაფხულში "ბარსელონა" "ლივერპულს" ფილიპე კოუტინიოს სანაცვლოდ 65 მილიონ ფუნტს შესთავაზებს.

ადრე გავრცელდა ინფორმაცია, რომ "წითლების" ფეხბურთელისთვის ასევე მადრიდის "რეალიც" იბრძვის.

მიმდინარე სეზონში კოუტინიომ "ლივერპულის" მაისურით 11 მატჩი ჩაატარა, გაიტანა 5 გოლი და გააკეთა 5 საგოლე გადაცემა. პორტალი Transfermarket.de ინგლისური გუნდის ფეხბურთელს 34 მილიონ ევროდ აფასებს, "ლივერპულთან" მისი კონტრაქტი კი 2020 წლამდეა გათვლილი.

აღსანიშნავია, რომ ესპანური მედიის ცნობით, "ბარსელონა" გასულ სეზონში კოუტინიოს შეძენას ცდილობდა, თუმცა მერსესაიდულმა კლუბმა კატალონიელები უარით გაისტუმრა.