ზამორას ტიტული: ვიქტორ ვალდესიდან - ტიბო კურტუამდე
უკვე გადაწყვეტილი ამბავია ის, რომ 2012-13 წლების ზამორას ტიტულს მადრიდის ”ატლეტიკოს” ბელგიელი კიპერი, ტიბო კურტუა აიღებს. აქამდე, კატალონიელთა კარის დარაჯი ამ ტიტულის 4-ჯერ ზედიზედ მოპოვებას ახერხებდა, თუმცა წელს მისი ეს შესანიშნავი სერია დაირღვა.
ტურნირის დასრულებამდე ”ატლეტიკოს”, ”ბარსელონას” მსგავსად, 2 მატჩიღა დარჩა სათამაშო, თუმცა უკვე ცნობილია, რომ ზამორას ტიტულს წელს ტიბო კურტუა მოიპოვებს, ვინაიდან ბელგიელმა წელს 35 მატჩი ითამაშა. აქედან 19-ჯერ მან კარის მშრალად შენარჩუნება შეძლო. ხოლო დანარჩენ 16 მატჩში 28 გოლი გაუშვა. 28 გაშვებული გოლი 35 მატჩში - იდენტური შედეგით მოახერხა ვიქტორ ვალდესმა შარშან ზამორას მოპოვება. რაც შეეხება კატალონიელთ კარის დარაჯს, ამ სეზონში მას 30 მატჩი აქვს ჩატარებული და კარის მშრალად შენარჩუნება მან მხოლოდ 9-ჯერ შეძლო. ჯამში კი ვალდესმა 33 გოლი გაუშვა.
მხოლოდ საოცრება უშველის ვიქტორ ვალდესს ამ ტიტულის ზედიზედ მეხუთედ მოპოვებაში. მან დარჩენილ 2 ტურში კარი მშრალად უნდა შეინახოს, ხოლო ტიბო კურტუამ ორ აუტსაიდერთან (”სარაგოსასთან”; ”მალიორკასთან”) მატჩში საკუთარი კარიდან 10 ბურთი უნდა გამოიღოს. დამეთანხმებით, რომ ეს უბრალოდ შეუძლებელია.
აღსანიშნავია ისიც, რომ ”ატლეტიკო” ერთადერთი გუნდია ლა ლიგაში, რომლის კარის მიმართულებითაც ჯერ-ჯერობით არცერთი თერთმეტმეტრიანი არ დანიშნულა.
მოკლედ, ჩვენ უკვე შეგვიძლია მივულოცოთ ტიბო კურტას პირველი ზამორას ტიტული, ხოლო ვალდესს არ გამოუვიდა თავის უკანასკნელ სეზონში ”ბარსელონას” მაისურით, კიდევ ერთი ზამორას მოპოვება.
ამ სიახლეზე კომენტარები გათიშულია.
კომენტარები [ 0 ]