მატჩისშემდგომი მიმოხილვა: გმირობა ლისაბონში
მეორე ტაიმი 15 წუთის დაწყებული იყო, როცა რაფინიამ ბურთი არსაიდან მიიღო, თითქოს აღარც ჰქონდა შანსი შეტევა შედეგიანად დაესრულებინა, მცველების გარემოცვაში, სულ მარტო მეტოქის საჯარიმოს მისადგომებთან, მაგრამ სხვა რწმენა აქვს ამ კაცს, მარტოა და მაინც სჯერა რომ ყველაფერი გამოვა, ყველაფერი შესაძლებელია, თუ რაფინიამ შეძლო და მიმდინარე სეზონში მსოფლიოს ერთ-ერთი საუკეთესო ფეხბურთელია, ესე იგი, ყველაფერი შესაძლებელია. წაიწია რამდენიმე ნაბიჯით და საჯარიმოს გარედან დაარტყა.. ეს ალბათ გადამწყვეტი მომენტი იქნება ამ ორი მატჩის ჯამში. ჯერ ძალიან ადრეა ამაზე საუბარი, მაგრამ "ბარსა" თუ "მონჟუიკზე" ლოგიკურ წერტილს დასვამს, ეგ წერტილი რაფინიას მოფიქრებული იქნება.
თუ წარმოიდგენდით ოდესმე რომ ჩემპიიონთა ლიგის ამ ეტაპზე ორი ფეხბურთელი განსაკუთრებით მაგარ ფეხბურთს ითამაშებდა? - დემბელე და რაფინია. იმას თურმე ჯანმრთელობაც სცოდნია, არადა, აქ სხვაგვარად იყო საქმე, რაფინია კიდევ აბსოლუტურად სხვა ფეხბურთელია, უდიდესი პროგრესი განიცადა. ასეა, ჩვენ ბევრ რამეს ვერ ვხედავთ, არ ვიცით როგორ ვარჯიშობს ეს ხალხი, რა თვისებებსა და უნარებს ავლენს, შესაძლოა ვარჯიშზე ჩანს ის, რის გამოვლინებასაც მწვრთნელები თამაშზე ელიან, ამის დრო კი ნელ-ნელა მოდის, ყველა ლიონელ მესი არ არის, ყველა თამაში ვარჯიშად აქციოს.
რაფინიასთან ერთად, ამ შეხვედრას მეორე გმირიც ჰყავდა, მოულოდნელი გმირი.
მხიარული სტარტი და წითელი ბარათი
მატჩი დაიწყო ძალიან მხიარულად, ორმხრივი შეტევებით, "ბენფიკამ" მაშინვე შეუტია და შესნის მზადყოფნა შეამოწმა, მაგრად იდგა პოლონელი, მეკარის საქმე კიდევ ეგრეა - თავიდან თუ მაგრად დადგა, მერე თავდაჯერებაც ემატება და როგორც წესი, კარგი მატჩი აქვს ხოლმე. გარდა ამისა, ყველა ხედავს, რომ შესნი ნელ-ნელა ძალიან კარგ ფორმაში შევიდა, თავიდან საშინელ ფორმაში იყო, "ბარსამ" მის გამო რამდენჯერმე იზარალა კიდეც, თურმე, დრო სჭირდებოდა ვეტერან მეკარეს, ბოლო მატჩები თავისი საუკეთესო პერიოდი გაგვახსენა. ამაში დიდი როლი ექნება ლევანდოვსკისაც, რომელმაც ძალიან შეუწყო ხელი ადაპტირებაში. საერთოდ, "ბარსაში" რომ მოვიდა, ეგეც ლევანდოვსკის დამსახურებაა.
საპასუხოდ შეუტია "ბარსამაც", სასტარტოში მყოფმა ოლმომ თავისი ჩვეული ფინტით გაჭრა "ბენფიკას" ცენტრი და მაგარი შეტევაც წამოიწყო, თუმცა, გოლით ვერ დასრულდა, ისევ თავად ცდილობდა დასრულებას. იმდენი გოლი ვერ გავიდოდა რამდენიც ბოლო მატჩში გავიდა ამ გუნდებს შორის, მაგრამ სტარტი ისეთი იყო რომ გოლები უნდა გვენახა, მერე კიდევ ყველაფერი რადიკალურად შეიცვალა, კუბარსიმ ბოლო იმედის ჯარიმა აიღო და მოედნიდან გააძევეს. სულ რაღაც 22-ე წუთზე. დიდი დარტყმაა გუნდისთვის. ტაიმნახევარი კაცნაკლული ყოფნა ვერ არის კარგი საქმე, მაგრამ ფლიკმა სწორად წარმართა თამაში და ურთულესი შეხვედრა მოიგო.
ვინმე უნდა გაეწირა და ოლმო გაწირა, ყველაზე ნაკლები ნდობა მის მიმართ აქვს. ჯერჯერობით. ის მოხსნა თამაშიდან და არაუხო შემოვიდა. ასეთ დროს საშინლად გრძნობს თავს ფეხბურთელი. ბრაზობს ბუნებრივია, არაფერი გაუფუჭებია, ეგ კი არა, მშვენივრად დაიწყო თამაში, მაგრამ წითელი ბარათი ყველაფერს ცვლის და უწევს მერე მოედნის დატოვება. თუმცა, ფლიკმა თამაში მოიგო, გამარჯვებულებს არ ასამართლებენ, ოლმოსაც მოუწევს მის გადაწყვეტილებებს პატივი სცეს.
მატჩის გმირი
უკვე ტაიმის მეორე ნახევარში სათამაშო სურათი შეიცვალა, უფრო ჩაკეტილი და ნელი გახდა, "ბარსა" დიდი ძალებით ვეღარ უტევდა, დაცვაში გამაგრდა, "ბენფიკასაც" აღარ ჰქონდა იმდენი მომენტი, რადგან კონტრშეტევებზე თამაშს ვეღარ ახერხებდა, არადა, ეგ არის ამ გუნდის მთავარი უპირატესობა. თუმცა, რამდენჯერაც მომენტი ჰქონდათ, შესნიმ იმდენჯერ გვაჩვენა რომ სანდო მეკარეა.
აი, მეორე ტაიმის საწყისი წუთები ისევ მაღალ ტემპში დაიწყო, როგორც ჩანს, მწვრთნელმა შეანჯღრია ლისაბონელები და შემოუძახა კაცნაკლულ გუნდს უფრო აგრესიულად უნდა შეუტიოთო, ამ სისწრაფეში შეცდომაც დაუშვეს და რაფინიამ მატჩის გადამწყვეტი გოლი შეაგდო. მთელი დარჩენილი დრო ისეთი ამბები ვნახეთ, მაგრად გაჭირდება მატჩის გმირის დასახელება - შესნი თუ რაფინია? მაინც რომელს უფრო დიდი წვლილი აქვს მატჩის მოგებაში?
ეს მატჩი თითქოს კიდევ ერთი გამოცდა იყო, რომელიც "ბარსამ" ჩააბარა, დიდ გზაზე გასავლელი აუცილებელი გამოცდა. წინ "ოსასუნასთან" მატჩია, მერე განმეორებითი შეხვედრა "ბენფიკასთან", წესით პოზიტიური განწყობა უნდა შეიქმნას, სანაკრებო პაუზის წინ კიდევ ცენტრალური მატჩი გველის ლა ლიგაში - "ატლეტიკო" - "ბარსელონა", თან ეს დერბიში ნაომარი გუნდი იქნება, გახარებული თუ დამწუხრებული, კაცმა არ იცის. მერე კიდევ დავისვენებთ.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 12 ]