მატჩისშემდგომი მიმოხილვა: მარჯვენა ფლანგის მხატვარი

   "ბარსამ" დიდი უპირატესობით მოიგო თავისი მატჩი, "მადრიდის" წაგების ფონზე. ჩემპიონობისკენ ერთი პატარა ნაბიჯი გადაიდგა, აქვე არიან მადრიდელები, ერთი და მეორე ბანაკიც, მაგრამ ობიექტურად რომ ვთქვათ "ბარსა" ამ სამიდან ყველაზე პროგრესირებადი გუნდია, ამაზე კი გატანილი გოლების რაოდენობაც მეტყველებს, ფლიკის გუნდმა 40 შეხვედრაში უკვე 124 გოლი შეაგდო, რაც 1959/60 წლების სეზონის შემდეგ საუკეთესო შედეგია ესპანური გუნდის შესრულებით. მატჩის შემდეგ ფლიკი კმაყოფილი ჩანდა, "ბენფიკასთან" სიფრთხილე დაგვიანონსა და ისიც დააყოლა სამივე ტიტულის მოგება შეგვიძლიაო. 

გაგახაროს ღმერთმა.  

მარჯვენა ფლანგის მხატვარი 

მატჩი თავიდანვე "ბარსას" უპირატესობით დაიწყო, მაღალი პრესინგით, ერთ ეპიზოდში პედრიმ მეკარეც შეავიწროვა და ახლოსაც იყო ანგარიშის გახსნასთან, პირველი განგაში აქ გაისმა "სოსიედადისთვის", რომელიც ახლა არაფრით გამორჩეული კლუბია, არადა, წარსულში ჰქონიათ კარგი პერიოდები, 80-იანებში ბაკერო და ბეგირისტაინი სწორედ მათგან მოვიდნენ "ბარსელონაში", ჩემპიონობისკენ გაიწიეს 2002/03 წლების სეზონში, როცა ნიჰატი, კოვაჩევიჩი, დე პედრო და რაც მთავარია, ჩაბი ალონსო ჰყავდათ, მაგრამ ბოლო ტურში გადაწყდა მათი მეორე ადგილი. ახლა კიდევ შეხედავ და არაფერი მოგეწონება. არც მათ კაპიტანს მოსწონს თავისი გუნდი, პირველივე ტაიმში მოსწყინდა თამაში, ბოლო იმედის ჯარიმა აიღო და თამაში დატოვა. 

ოლმო წააქცია, ერთი-ერთზე გაქცეული. წესით, საერთოდ არ უნდა ეთამაშა, მაგრამ გავის სიცხე ჰქონდა წინა დღით და მას ერგო ადგილი ძირითადში. კარგ ფორმაშია, ბოლო მატჩებში პროდუქტიულია და მასთან ერთად შეტევები უფრო სწრაფი და დინამიკურია. ბოლო პასის უნარიც აქვს, კარშიც კარგად ურტყამს და დრიბლინგზეც მიდის საჭიროების შემთხვევაში. 

წითელი ბარათის მერე ისედაც დაცვაში მყოფი "სოსიედადი" მთლიანად კარში ჩადგა, მაგრამ ლამინე იამალს მაინც ვერაფერი მოუხერხეს, ერთი მცველი, ორი, მესამე.. თითქოს არც აქვს მნიშვნელობა, ასეთი ჭკვიანი და ტექნიკური ფეხბურთელი დღევანდელ ფეხბურთში სანთლით საძებარია, ქომაგი უკვე მისი თამაშის მოლოდინშია, თანაც, არა მხოლოდ "ბარსელონას", არამედ სხვა კლუბის ფანებიც შეავლებენ თვალს, რატომაც არა, მოენატრა ყველას კარგი ფეხბურთი. და მაინც რა არის მისი ნიჭის საზომი? მთელი სეზონია უმაღლეს დონეზე თამაშობს, საზომი კიდევ ჩემპიონთა ლიგაა. პლეიოფები. თანამედროვე ფეხბურთის ყველაზე მაღალი წერტილი. აი, მანდ ვნახოთ რა შეუძლია. იქაც თუ მიალაგა მცველები შეშის ნაჭრებივით, მართლა დაუჯერებელი გახდება ეს ამბავი, ახლა თუ ასეთ ფეხბურთს თამაშობს, ნეტავ სად შეიძლება წავიდეს პერსპექტივაში? ნიჭს საზღვარი არა აქვს, უბრალოდ მუდმივი კვება სჭირდება. 

დახატა ლამინემ, ფლანგზე ერთ მცველს გაექცა, მეორე გაუშვა მაიორკაზე, დასასვენებლად, დროული და ზუსტი პასიც მოიფიქრა, ოლმომ არაორდინალური გაგრძელება იპოვა და ფლანგზე გადაჰკიდა ბურთი საიდანაც ჟერარ მარტინმა შემოირბინა და ზუსტი დარტყმით ანგარიში გახსნა. ლამაზი იყო ეს ოხერი, ძალიან ლამაზი. 

მცირე ხანში ანგარიში ორამდე გაიზარდა, ოლმოს დარტყმის მერე ბურთი კასადოს მოხვდა და უკიდურეს კუთხეში შეგორდა. ჯანდაბას, ჩავუთვალოთ ჩვენც კასადოს. სჭირდება ეს გოლი, დაკარგა ადგილი ძირითადში და ცოტა გამოუკეთებს ხასიათს. თუმცა, ფლიკი შეძლებისდაგვარად ყველას აძლევს სათამაშო დროს. 

დასვენების ტაიმი 

ფლიკის "ბარსასთან" მიმართებაში ხშირად გაგვიხსენებია პეპ გვარდიოლას "ბარსელონა". მისი პირველი სეზონი. პირველ ტაიმში მომთავრებული საქმე და დასვენება მეორეში. გოლები ისევ გავიდა, "ბარსას" ტემპი არ დაუგდია, უბრალოდ აშკარად ჩანს რომ ეს ყველაფერი მაინც ძალების დაზოგვით ხდება, გუნდმა რაციონალურად თამაში ისწავლა, სეზონი დიდია, დასკვნითი ეტაპი უკვე დაწყებულია და ძალების დაზოგვას, შესაძლოა, გადამწყვეტი მნიშვნელობაც ჰქონდეს. 

ანგარიში სამამდე კაპიტანმა გაზარდა, კუთხური რაფინიამ ჩააწოდა, როგორც ყოველთვის სახიფათოდ, ლევანდოვსკის დარტყმა მეკარემ მოიგერია, დამატებაზე კი არაუხომ ივარგა. გავიდა დრო და საგოლე პასიც მიითვალა, ოლმოსი არ იყოს ისიც კარში ურტყამდა, მაგრამ კასადოსგან განსხვავებით ლევანდოვსკიმ ზუსტად იცოდა რასაც აკეთებდა, ეტო'ოს სტილში, ბურთზე პატარა შეხებით გადაგზავნა კარისკენ - 4:0. ასეც მორჩა. ლამაზად და შედეგიანად. "ბენფიკასთან" მატჩის წინ განწყობა მშვენიერია. 

ფლიკმა შეცვლები გააკეთა და ისევ მისცა დრო ფერან ტორესს, რომელმაც ისევ ვერ გამოიყენა რამდენიმე მომენტი. კაცმა არ იცის მისი ეს არასტაბილურობა სად წამოყოფს თავს. 

კალენდარი არც ისე რთულია, დიდი მნიშვნელობა ექნება სანაკრებო პაუზიდან მწყობრში დაბრუნებას. მანამდე კიდევ ლიგის პლეიოფებია. 

დედის დღეს გილოცავთ!