The Athletic - როგორ მოაგვარებს ფლიკი საყრდენი ნახევარმცველის პრობლემას

ფლიკის დებიუტს მსოფლიო პრესა გამადიდებელი შუშით აკვირდება და რამდენიმე ცნობილმა გამოცემამ სტატიაც მიუძღვნა. მაგალითად, The Athletc-მა აქცენტი საყრდენი ნახევარმცველის პოზიციაზე გააკეთა. სტატიას უცვლელად გთავაზობთ.

   ფლიკის სადებიუტო შეხვედრაში რამდენიმე საინტერესო ფეხბურთელი გამოჩნდა, განსაკუთრებული ყურადღება მიიქციეს მარკ კასადომ და მარკ ბერნალმა. შეხვედრა 2:2 დასრულდა, "ბარსამ" პენალტების სერიაში მოიგო. ლა მასიას აღზრდილების შემხედვარე ქომაგებს კითხვა გაუჩნდათ - საჭიროა თუ არა ახალი საყრდენი ნახევარმცველის შეძენა? 

მაგალითად, ჩავი ერნანდესის გუნდი მეტწილად სწორედ ამიტომ დაზარალდა, ვერაფრით გამოინახა ბუსკეტსის შემცვლელი. მისი ძიება ჯერ კიდევ მაშინ დაიწყო, როცა სერხიო კლუბში ირიცხებოდა. ბუსკეტსმა "ბარსაში" 15 სეზონი გაატარა, 722 შეხვედრაში მიიღო მონაწილეობა და ძალიან გავლენიან ფეხბურთელად ითვლებოდა. თავდაპირველად ჩავიმ ფრენკი დე იონგი და ერიკ გარსია მოსინჯა, მაგრამ ვერ მიიღო ის, რაც სურდა. საბოლოოდ, ბუსკეტსს დე იონგი შეუწყვილა და ამან იმუშავა, "ბარსამ" ლა ლიგა მოიგო. 

მომდევნო სეზონში ჩავი უკვე ფაქტის წინაშე დადგა, ბუსკეტსი მესისთან წავიდა მაიამიში, მისი შემცვლელი კი ისევ არ ჩანდა. დააბრუნეს კიდევ ერთი ლამასიელი, ორიელ რომეუ, ერნანდესს სუბიმენდის დამატებაც სურდა, მაგრამ ეს სურვილი ვერ შეუსრულეს, სეზონის წინ რომეუს კარგი შეხვედრები ჰქონდა და მწვრთნელები იმედიანად იყვნენ. ფორმულა არ შეცვლილა, რომეუსთან ახლოს მოქმედებდა ფრენკი დე იონგი, მაგრამ როდესაც ნიდერლანდელმა ტრავმა მიიღო რომეუმ უმარტივესი დავალებების შესრულებაც ვეღარ შეძლო. 

ჩავი წავიდა, პრობლემა კი უცვლელია. ამჯერად ახალი მწვრთნელი ეძებს სწორ კანდიდატურას. თუმცა, სატრანსფერო ფანჯარაზე კლუბის პრიორიტეტი შემტევების დამატებაა - ნიკო უილიამსისა და დანი ოლმოს სახით. ასე რომ, ლა მასია ისევ ძალიან აქტუალურია. კლუბს ისევ მილიარდიანი ვალი აქვს, ჰანსი ფლიკმა დიდი დრო გაატარა აკადემიის ფეხბურთელებთან ერთად და მათი შესაძლებლობებით მოხიბლულია, და როგორც კლუბის შიდა წყარო იტყობინება მასზე განსაკუთრებული შთაბეჭდილება მოახდინა მარკ კასადომ. 

გასულ სეზონში 20 წლის ნახევარმცველი "ბარსას" სარეზერვო გუნდს კაპიტნობდა, გუნდის მწვრთნელი ლეგენდარული მექსიკელი რაფა მარკესია, რომელიც მთავარი გუნდის მწვრთნელობის ერთ-ერთი კანდიდატიც იყო. კასადოს რამდენჯერმე პოზიციის შეცვლა მოუწია მას შემდეგ რაც ექტორ ფორტი ჩავიმ დააწინაურა. უფრო მეტად შემტევი გახდა, უფრო მეტად ორიენტირებული მეტოქის კარზე, საბოლოოდ, მარკესი მისი გარჯით კმაყოფილი დარჩა. 

ივნისში კასადომ კონტრაქტი 2028 წლამდე გაახანგრძლივა და პირობაც მიიღო რომ ფლიკის გუნდის წევრი იქნება. აკადემიაში მას ახასიათებენ როგორც მოედნის კარგი ხედვის მქონე ფეხბურთელს, რომელიც ტაქტიკურად განსწავლულია და თამაშს კარგად კითხულობს. მთავარ გუნდში მისი დებიუტი უკვე შედგა, ჩავი ერნანდესმა 2022 წლის ნოემბერში ათამაშა, კასადოსთვის ეს დღე განსაკუთრებულად ემოციური გამოდგა, მატჩის ბოლოს აღნიშნა, რომ ჩავი მისთვის ყოველთვის მისაბაძი ფეხბურთელი იყო. 

კასადო დიდი ენთუზიაზმით ხვდება ახალ სეზონს, მაგრამ ის არ არის ერთადერთი, რომელმაც ფლიკზე დიდი შთაბეჭდილება მოახდინა. 

კიდევ ერთი დიდი პოტენციალის მქონე ფეხბურთელი მარკ ბერნალია, ჯერ კიდევ 17 წლის ფეხბურთელი, რომელის სიმაღლეც 191 სანტიმეტრია. 10 წელია ლა მასიას აკადემიაშია, აღნაგობით და სტილით ძალიან ჰგავს სერხიო ბუსკეტსს. იმ პირობებში, როცა შეუძლებელია "სიტიდან" როდრის გადმოყვანა, მისი მსგავსი ფეხბურთელის აკადემიაში ძებნა სწორი გამოსავალია, ბერნალი როდრის მსგავსად ძლიერია ფიზიკურად და ასაკის მატებასთან ერთად ეს უპირატესობა კიდევ უფრო თვალსაჩინო გახდება. 

შესაძლოა, ამ მომენტისთვის კასადოს მეტი შანსი ჰქონდეს ძირითად გუნდში, მაგრამ, ბერნალის პოტენციალი გაცილებით დიდია. აკადემიაში ამბობენ, რომ ბერნალს შემოთავაზებები აქვს ინგლისიდან, გერმანიიდან და ლა ლიგის სხვა კლუბებისგან, მაგრამ მისი მთავარი მიზანი "ბარსას" ძირითად გუნდში მოხვედრაა. 

ფლიკმა "სიტის" წინააღმდეგ მოედნის საყრდენ ზონაში სწორედ მათი დუეტი გამოიყენა. ბერნალი შედარებით სიღრმიდან თამაშობდა, კასადოს კი მეტი სივრცე ჰქონდა შეტევაში წასასვლელად და პირველ გოლშიც მიიღო მონაწილეობა. თუ სატრანსფერო ფანჯარაზე "ბარსამ" საყრდენი ნახევარმცველი არ დაიმატა, ხშირად მოგვიწევს კასადოსა და დე იონგის წყვილის ხილვა, ამას გარდა, აუცილებლად შედგება ძირითად გუნდში მარკ ბერნალის დებიუტი. 

ბუსკეტსის შეცვლამდე ჯერ ძალიან ადრეა, მაგრამ როგორც მინიმუმ კანდიდატები გამოჩდნენ.