მატჩისშემდგომი მიმოხილვა: ბოლო მოსაწყენი გვერდები
ქრისტე აღდგა!
ქრსიტე აღსდგა!
მომილოცავს ეს დიდებული დღესასწაული. ახალი იმედებისა და უკვდავების დღესასწაული.
აღდგომაზე დიდი არც არაფერი არსებობს. იმხელა სიმშვიდე მოაქვს ვერაფერი წყობიდან ვერ გამოგიყვანს, მათ შორის, ვერც საყვარელი გუნდის მარცხი. არა უშავს, გოლები ხომ მაინც გავიტანეთ. ეგ არაფერი, იამალი მაინც ხომ გვყავს.
ოთხი ტურია დარჩენილი, "მადრიდი" გაჩემპიონდა, "ჟირონა" მეორეზე დაწინაურდა, კარგია ლა ლიგისთვის, ოთხი ანგარიშგასაწევი გუნდი ჰყავთ უკვე, მესის წასვლის მერე მაქსიმალურად იკლო ლა ლიგის მაყურებელთა რაოდენობამ, ახლა მხოლოდ მსაჯების სანახავად თუ მოვა ვინმე, თუ მოიწყენს ადამიანი გასართობად ლა ლიგას ეწვევა. როგორც მინიმუმ, ერთხელ მაინც იკისრებს მსაჯი რამე ისეთს რომ გაგამხიარულოს.
წინ ოთხი ნაძალადევი ტურია დარჩენილი, ამ დროს, ისტორიულად, "ბარსა" ახალგაზრდებს აძლევდა ხოლმე შანსს, მაგრამ ახლა ეგეც აღარ გამოვა, ბოლო რამდენიმე წელია, "ბარსას" ისედაც ბავშვები გამოჰყავს მოედანზე. მეორე ადგილისთვის ბრძოლა "ჟირონასთვის" იქნება მოტივაცია, ჩავისთვის არა. უკვე ყველაფერი გარკვეულია. ჩავი დარჩება, ტრანსფერები აუცილებლად იქნება, ჩემპიონთა ლიგა ახალი ფორმატით ჩატარდება, მანამდე კი ევროპის ჩემპიონატით გავერთობით, სადაც "ბარსელონას" ფეხბურთელებთან საქართველოს ნაკრებიც გადაიკვეთება.
მარკო იქა, მარკო აქა
ეგრე დაიწყო თამაში, იამალის პასი იყო მშვენიერი და კრისტენსენმა მარკო ვან ბასტენივით შეასრულა. მკერდით მიიღო ნახევარბრუნში და დაუშვებლად შეაგდო დაბალ კუთხეში. შესძლებია. ეს იყო პირველი გოლი ამ შეხვედრაში და ბოლო გოლზეც მარკო ვან ბასტენი გამახსენდა, ამჯერად "ჟირონამ" შეაგდო და წერტილიც დასვა - 4:2 მათ სასარგებლოდ. პორტუმ გაიტანა ეს ლამაზი გოლი.
ვერ იყო "ბარსას" დაცვა მოწოდების სიმაღლეზე. კიდევ ოთხი შეხვედრის ჩატარება მაგრად ეზარებათ, ალბათ. ვინც ევროზეა უკვე მაგაზე ფიქრობს და ფრთხილობს, მაგის გარდა, კოპაც ტარდება წელს და ეგ ხალხიც მოიძებნება გუნდში. ვინც არც ევროზე თამაშობს და არც კოპაზე, სადღაც განსწამენდელში ექნება ადგილი - პლაჟზე! მზე, ზღვა, დასვენება. ბურთის გარეშე. გაშლილი სმარტფონი და ამოკითხული ტრანსფერები.
კრისტენსენის გოლის მერე ერთ წუთში გაათანაბრეს ანგარიში. დოვბიკმა შეაგდო და საწყის ოთხ წუთში უკვე ორი გოლი იყო გასული. ამ გოლმა "ჟირონას" თავდაჯერება შემატა, რომელიც ისედაც არ აკლიათ, მთელი სეზონია თავს აჯერებენ, რომ შეუძლიათ და აგერ სეზონის ბოლოს შეძლეს.
სხვათა შორის, კარგ ფეხბურთს თამაშობენ, რთული სათქმელია ახლა ერთი სეზონი გაიბრწყინეს თუ მყარი ფუნდამენტი ექნებათ. დაზღვევით მულტიკლუბური სისტემა აზღვევს, არ მოაკლდებათ არც კარგი ფეხბურთელი და არც ფინანსები. არც პეპ გვარდიოლას გაკვეთილები, არც ძლიერი აკადემია.
დრო გვაჩვენებს.
დრო იამალსაც გვაჩვენებს. მიმდინარე სეზონში საოცარი პროგრესი აქვს. ყოველ წელს ასე თუ განაგრძო, მეგა-ვარსკვლავი გვეყოლება გუნდში. ნელ-ნელა შედეგიანობასაც მოუმატებს, ფეხზეც უფრო მყარად დადგება, სისწრაფე და ტექნიკა აქიდანვე არ აკლია.
მეორე გოლიც მისი დამსახურებაა, კარგი დრიბლინგი ჰქონდა, თერთმეტმეტრიანი გამოიმუშავა. ლევანდოვსკი შეხტა თავისებურად და ზუსტად დაარტყა. ტაიმის ბოლოს იყო ეს ამბავი, "ბარსა" დაწინაურდა, მეორე ტაიმი კი 0:3 წააგო.
რა გვაკლია
ბევრი რამ აკლია ამ გუნდს. ძალიან დიდი ხანია იწერება ბერნარდუ სილვას ტრანსფერზე, ყოველ წელს უფრო ახლოს მოდის და ახლა ალბათ დანამდვილებით მოვა. პიკი გადავლილი აქვს, კლასი შერჩენილი. რამდენიმე პოზიციაზე შეიძლება მისი გამოყენება და ნაღდად წაადგება გუნდს. გაიხსნება თუ არა ფანჯარა, ისევ დაიწყება ამაზე საუბარი.
მთავარი ამბავი კი ქართველის გარშემო იქნება ატეხილი, "მადრიდი" მბაპეს გაიფორმებს, ისედაც იდეალურად დაკომპლექტებული გუნდი მსოფლიოს საუკეთესო ფეხბურთელს დაიმატებს. "ბარსამ" რა უნდა ქნას? ასევე ვარსკვლავი უნდა მოიყვანოს, ფული ცოტაა, მაგრამ ეს ვარსკვლავი თუ ქართველია, არც ისე ძვირი დაჯდება. ბრაზილიელი რომ იყოს ეღირებოდა ასე 180 მილიონი.
ქართველი "ბარსელონაში"..
აბა წარმოიდგინეთ.
დიდი ამბები გველის ზაფხულში. მე ფორვარდზეც არ ვიტყოდი უარს, მაგრამ თუ კვარაცხელიას გაწვდებიან, ჯანდაბას, კიდევ ერთი სეზონი ვუყურებ ხანშიშესულ ლევანდოვსკის.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 8 ]