მატჩისშემდგომი მიმოხილვა: შიგნით ათასი, გარეთ ატლასი
ლა ლიგას ისეთი კაცი ხელმძღვანელობს კიდე კარგ დღეშია ესპანური ფეხბურთი. მთელი მსოფლიო ესპანელ მსაჯებზე ერთობა, ტებასი კიდე ამ საცოდავებს საქმეს ურთულებს, ჯიუტად უარს ამბობს ტექნილოგიაზე, რომელიც ავტომატურად აფიქსირებს გადაკვეთა თუ არა ბურთმა ხაზი.
ძვირიაო - ასე თქვა, თავის დროზე.
შესაძლოა, ურჩევნია ადამიანს მიანდოს გოლის ბედი და არა ტექნოლოგიას. VAR-ზე არ უთქვამს უარი, რადგან იმ კაბინაშიც ხალხი ზის და როგორც ჩავლილი სეზონებიდან ვიცით, იმ ხალხს შეუძლია შავზე თქვას თეთრიაო, ან პირიქით.
მოკლედ, კაცთმოყვარეა ტებასი. კაცობრიობა მანქანებთან ბრძოლას იწყებს, ტებასი კი საძირკველშივე აპირებს ამ უწმინდური ომის ჩაკვლას!
გაიგე ახლა იყო თუ არა გოლი.. "ბერნაბეუზე" კამერა არ მოიძებნა, რომელიც ზუსტი რაკურსით, გასწვრივ გვაჩვენებდა ამ მომენტს, გაჭირდებოდა, მაგრამ გაიგებდა რამეს კაცი, ახლა კი მაგრად გაჭირდა, თუმცა, წარმოდგენას მაინც გვიქმნის.
თავად ტებასიც გამოეხმაურა ამ ამბავს, უცბად მოჩხრიკა ფოტოები ისეთი მატჩებიდან სადაც ბოროტის მანქანებას რაღაც შეეშალა, რამდენიმე ასეთი ფოტო გააზიარა და ბევრისმთქმელი კომანტარიც დააყოლა - "კომენტარის გარეშე".
არადა, მატჩის საუკეთესო ფეხბურთელის უმაგრესი გოლი გაუქმდა. ამაზე უფრო დამწყდა გული, ვიდრე საბოლოო შედეგზე. მატჩის შედეგი ბევრს ვერაფერს შეცვლიდა, "ბარსამ" ეს რთული სეზონი თავიდან ბოლომდე ჩააგდო. იყო რაღაც გამონათებები, მაგრამ საკმარისი მხოლოდ იმისთვის გამოდგა, რომ მეორე ადგილზე იყვნენ ჩემპიონატში.
ეგ არის და ეგ.
აი, ლამინე იამალი კი მომავალია. ჩვენს თვალწინ გახდება ვარსკვლავი და დიდ ისტორიას დაუდებს სათავეს. ხანდახან არ მჯერა რომ 16 წლის არის.
ჩვეული ელ კლასიკო
კარგად დაიწყო - კრისტენსენი ახტა, კროოსს გადააფრინდა, ლუნინი გამოსვლაზე შეცდა და ერთით ნული. უკეთესს ვერ ინატრებ. გოლის გატანა ისე გართულდა ამ სეზონში, "ბარსას" მთავარ იარაღად სტანდარტული მდგომარეობები იქცა. "მადრიდმა" მალევე შექმნა მომენტები, ბოლოს კი პენალტიც მიიღო.
ჩემი აზრით ეს იყო თერთმეტმეტრიანი. ვასკესმა ფეხი დატოვა, პენალტზე ითამაშა, მაგრამ სრულ სურათს არ ცვლის, ეგეც ფეხბურთის ნაწილია, მაგასაც ჭკუა სჭირდება. ითამაშა ისე, როგორც ნეიმარმა პსჟ-სთან, პირველი ეგ გამახსენდა, ნეიმარი უფრო ვირტუოზული იყო, უფრო კარგადაც გააფორმა, მაგრამ აზრი ეგ არის - საჭირო დროს, საჭირო ადგილზე.
პირველ რიგში, კანსელუა სახსენებელი, მცველია, მაგრამ მცველი არ არის. ადრე ასეთი გამოცანები იყო ხოლმე, დამაბნეველი. ახლა კანსელუს ერგება კარგად. არის, მაგრამ არ არის.
ცოტა დააკლდა შტეგენს ასაღებად, თავიდან მომეჩვენა რომ ნახტომი დააგვიანა, ზედა კადრიდან კი გამოჩნდა, რომ კი არ დააგვიანა, უბრალოდ ვინისიუსის პაუზის დროს შეყოვნდა, მოძრაობას აჰყვა, მოტყუვდა. არ ეშლება ბრაზილიელს ეგეთები.
მერე ორი სტანდარტი იყო, ორი კუთხური, "ბარსას" მძლავრი იარაღი! ერთი მცირედით აცდა, მეორე კი არ აცდა. გავიდა, მაგრამ აქ მეორე გამოცანა გაგვეჩითა - გოლია, მაგრამ გოლი არ არის - რა არის? ტებასი!
"მონჟუიკზე" არ ვიცი, მაგრამ "კამპ ნოუზე" ჩათვლიდნენ. ჩემსას ვერა, მაგრამ ლუკას ვასკესის თავს დავდებ, ჩათვლიდნენ!
მეორე ტაიმი
ფერმინ ლოპესს თავი ლიონელ მესი ეგონა. წამიერად მაინც. არის ხოლმე ალბათ ერთი-ორი ღვთაებრივი წამი, "მადრიდს" რომ "ბერნაბეუზე" გაუტან თავი ყველაზე დიდი გგონია ყველა დიადს შორის. ჰოდა, შეხტა ფერმინიც თეთრების ტრიბუნაზე და სწრაფადვე მობრუნდა უკან, მართლა მესი კი არ არის ცივი მზერა მიეპყრო ტრიბუნისკენ და სადღაც გონების კუნჭულში ეთქვა - Madrid cabron, saluda el campeon!
სხვა დროა ახლა. სხვა ხალხის ისმის აქ ჟრიამული. ჩემპიონობისგან ისე შორს არ ვართ, როგორც ფერმინი მესისგან, მაგრამ არც ღირს მაგაზე ლაპარაკი.
მანამდე, კიდევ ერთხელ გაწვალებული და ნათრევი კამავინგა ვნახეთ. უფრო სწრაფია და უფრო ძლიერი, მაგრამ მაინც ეგრე მოხდა, სულ უკან იყო, სულ მისდევდა და ვერ ეწეოდა.
ეს დასაწყისია. ბიჭი 16 წლის არის.
"ბარსა" დაწინაურდა, მაგრამ ალბათ თქვენც ხვდებოდით, რომ ანგარიშს ვერ შეინარჩუნებდნენ. ახლა არა. ამ სეზონში ვერა. მერე შეიძლება.
კანსელუს ისე ჩამოეძინა, როგორც პარიზელებთან. მერე ხელები გაასავსავა, მაგრამ არაუხომ უთხრა ჩამოიღე ეგ ხელები თორემ მოგამტვრიე ძირშიო - რაღაც ასეთი უთხრა, ურუგვაული აქცენტით. ჰოდა, ჩამოიღო.
გადამწყვეტი გოლი ბელინგემს გაუტანია, თურმე. ეგ აღარ მინახავს. "ბარსასთვის" ფრე უკვე მარცხის ტოლფასი იყო. "მადრიდი" კი იდეალური გუნდის შთაბეჭდილებას ტოვებს. სანამ პერესი ეტაპობრივად განაგრძობდა შენებას, რათა ლეგენდები ვარსკვლავებით ჩაენაცვლებინა, მანამდე ბართომეუმ მესის კისერზე გაიარა და გუნდს ძირი გამოუთხარა.
ახლა კი წვალობენ "ახლები", რაღაცები გამოსდით, რაღაცები არა. ჩვენ კი ბარტყების იმედი გვაქვს. მოდიან და მოდიან. წესით კი უნდა გამოვიდეს რამე.
მოთმინება გვმართებს.
მოდი და ნუ იფიქრებ გათეთრებულ მბაპეზე, დუელში გამოწვევას ჰგავს, და როგორც წესი, "ბარსა" ყოველთვის პასუხობდა ამ გამოწვევას, გინდ მოედანზე, გინდ სატრანსფერო ბაზარზე.
წავედით ბანკში, მორიგი კრედიტია ასაღები!
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 11 ]