მატჩისშემდგომი მიმოხილვა: პაპენის და გიგზის ანარეკლი

"ბარსა" მეოთხედფინალშია. ძალიან კარგი გადაწყვეტილება იყო კოპე დელ რეიზე ორმატჩიანი შეხვედრების გაუქმება, ამით ფეხბურთელებიც მეტს ისვენებენ და თასის თამაშებიც ისეთი მოსაბეზრებელი აღარ არის. მეოთხედფინალში კარგი გუნდები დარჩნენ, "მადრიდი" თანაქალაქელმა გააგდო, გრიზმანს შეხედავ და სულ სხვა კაცია, როგორც ჩანს ისევ გაიღვიძა მისტერ ჰაიდიმ, ჩვენ კი დოქტორი ჯეკილი გვერგო.
ასეთი "ბარსას" დამარცხება ბევრს შეუძლია, მაგრამ ჩვენ ჯიუტად იმედიანი ხალხი ვართ და გვჯერა რომ ამ ტურნირის მოგება შესაძლებელია. არაფერი შეუძლებელი ამაში არ არის. შეუძლებელი ჩემპიონთა ლიგის მოგებაა, მაგრამ ჯიუტად იმედიანებს იქაც გვჯერა რომ მაგალითად "ნაპოლის" ბარიერი გადაილახება. არა იმიტომ, რომ "ბარსას" ეს შეუძლია, არამედ იმიტომ, რომ "ნაპოლი" საშინელ დღეშია.
რა თქვა ჩავიმ
რა თქვა და იმ დღესვე წავალ, როცა ვნახავ რომ ფეხბურთელები აღარ გამომყვებიანო. რატომ თქვა ეს? იმიტომ რომ კითხვა დაიბადა, ეჭვი გაჩნდა და ეს ეჭვი მე პირადად მიმძაფრდება. გუნდი უკმაყოფილოა. ალბათ იმიტომ, რომ ვერა და ვერ ჩამოყალიბდა ძირითად თერთმეტეულზე, არ აძლევს ეს ხალხი ამის საშუალებას, მეტად არასტაბილური ტიპები არიან, ერთგულება კიდე აქიდან მოდის, თუ ძირითადში ხარ ერთგული ხარ, თუ ხშირად იცვლები, მაშინ პრეტენზიები ჩნდება, ჰოდა, ჩავის მიმართ ყველა პრეტენზიულია, განსაკუთრებით შემტევები.
არის კიდევ ერთი დიდი პრობლემა, თითქოს იდეები გამოელია. როცა მოვიდა ბევრ რამეს ცვლიდა, თითქოს ძიების პროცესში იყო, მერე იპოვა რაღაც, შეისვენა, გაჩერდა, ახლა ის რაღაც აღარ მუშაობს, მაგრამ ცვლილებებსაც ვეღარ ვხედავთ. ან დანებდა ჩვენი ძმა, ან აღარ იცის რა ქნას.
საშინელი პირველი ტაიმი
"ბარსა" ძირითადი შემადგენლობით გავიდა. კი, იყო რამდენიმე ცვლილება, მაგრამ ძირითადი ჰქვია ამას. მიუხედავად ამისა, პირველ ტაიმში "უნიონისტასი" უკეთესი იყო, უფრო კარგი მომენტები შექმნეს და ალბათ მოგებასაც იმსახურებდნენ. გოლები კი ფანტასტიური გავიდა. მაგალითად, პირველ გოლზე ჟან-პიერ პაპენი გამახსენდა, ალვარო გომესმა ზღაპრული გოლი შეგვიგდო.
ბრავო ალვარო!
ერთი პაპენს აქვს ასეთი შეგდებული და მეორე დენი მინს, - პატიმრების გუნდის კაპიტანს.
თუმცა, "ბარსამ" მოახერხა და ტაიმის მიწურულს ანგარიში გაათანაბრა. გაუხეთქა გული შეკრებილ ქომაგს, პატარა გუნდების ამბავი ხომ იცით? დაიწყებენ ახლა - "ბოლო წუთებზე რომ არ გაგვეშვა..." "სულ ასე გვემართება" და ა.შ, მათი თავი ასე მუშაობს, ბოლომდე დაიჯერებენ რომ ყველაფერი შეეძლოთ, უბრალოდ იღბალმა ზურგი აქცია.
უკეთესი მეორე
რა გასაკვირია?! ჩავის გუნდს მეორე ტაიმი უკეთესი ჰქონდა. პირველი ყოველთვის საშინელია. განსაკუთრებით პირველის პირველი წუთები, შეიძლება წამებიც. არ არის შემთხვევითი რომ თამაშის დაწყებისთანავე იქმნება მომენტები ჩვენს კართან, თითქოს ძინავთ "ბარსას" მცველებს, ვერ ფხიზლდებიან, სადღაც მიწურულს იწყებენ გამოფხიზლებას.
ჩავის ადგილზე ბევრს ვიფიქრებდი ამ ფენომენზე, არ ვიცი გასახდელში რას ეუბნება ფეხბურთელებს, მაგრამ ფაქტია რომ მისი სიტყვები ისე მოქმედებს, როგორც დამაძინებელი. იმის მაგივრად რომ მაგრად შეახუროს ეს არაფრის მაქნისები. მოკლედ, დიდი მოტივატორი ჩავი ვერ ჩანს, იდეებზე კიდე უკვე ითქვა.
მეორე ტაიმში მცველების გოლებით მოვიგეთ. ორივე ძალიან კარგი გოლი იყო, არ დავმალავ, ველოდი რომ შორი მანძილიდან არაუხო უფრო სწრაფად გაიტანდა, ვიდრე კუნდე. ურუგვაელი ხშირად ურტყამს და სულ ცოტა აკლდება ხოლმე, კუნდე კიდე იშვიათად აკეთებს ამას, მაგრამ აი.. შეაგდო.
გამტანი ცენტრები კიდე ბოლო დროს დიდად არ გვყოლია. ყველაზე მეტი პიკეს გაჰქონდა. მანამდე კი ძალიან დიდი კაცი გვყავდა, რომელსაც დღემდე ეკუთვნის ყველაზე გამტანი მცველის სტატუსი, მაგრამ ეგ იქით იყოს, ძალიან შორს არის.
მეორე გოლიც მშვენიერი გამოვიდა, ბალდემ დაადო თავი რაიან გიგზივით და დარტყმითაც ისე დაარტყა როგორც გიგზმა "არსენალთან", მხოლოდ ერთი განსხვავება იყო, ბალდეს მაისური არ გაუხდია და თმიანი გულმკერდით ხალხი შოკში არ ჩაუგდია.
გავიდა "ბარსა". მეოთხედფინალში ვართ.
ვინც გინდა ის შეგვხვდეს. იქამდე ფორმაშიც შევალთ.
ასეთი სპორტია ფეხბურთი, ეს დაბეჩავებული "ბარსა", შეიძლება იმაზე შორს გავიდეს, ვიდრე ბევრად კარგი ფორმაციის "ბარსა" გასულა.
მოკლედ, დაველოდოთ წილისყრას.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 8 ]