მატჩისშემდგომი მიმოხილვა: ბოლო წუთის მადლი
მსაჯების კიდევ ერთი დიდებული პერფორმანსი ვიხილეთ მატჩის ბოლო წუთებზე, შეიყარნენ, იმსჯელეს და დაასკვნეს, რომ თურმე ბოლო იმედის ჯარიმა ყოფილა.
ჯერ მეგონა ხელით თამაშს ამოწმებდნენ, მერე იყო თუ არა დარღვევა, ბოლოს გაირკვა, რომ კვლავ მოწოდების სიმაღლეზე არიან. ხუთი წუთი არჩევდნენ ბოლო კაცმა დაარღვია თუ არა თამაშის წესი. მატჩის წინ ლევანდოვსკიმაც ისაუბრა მსაჯებზე, არაფერი მსგავსი ნანახი არ ექნებოდა, ძირითადად გერმანიაში მოღვაწე კაცია, იქ ამ მხრივ ყველაფერი რიგზეა, აქ კიდე გადაიყვანეს ჭკუიდან.
ყველაზე მეტად ვისაც სჭირდებოდა გამარჯვების გოლი იმან შეაგდო, ახლა უნდა მიაყოლოს წესით, დაიწყოს ნელ-ნელა ფორმაში შესვლა და ჩემპიონთა ლიგაზე გამხიარულდება კიდეც. პენალტი უმაღლეს დონეზე შეასრულა, ნახტომთან ერთად თავი აწიო და მეკარის მოძრაობას დააკვირდე არ არის მარტივი, და უფრო რთულია წამში დაიმორჩილო სხეული და გონების კარნახით უხელმძღვანელო.
ასე მოვიგეთ. დიდი ხანია მივეჩვიეთ, რომ "ბარსა" ბრძოლაში იგებს თუნდაც უბრალო შეხვედრებს. ის დრო წავიდა ყველაზე ხუთი თავით მაღლა რომ იდგნენ, ახლა ყველა ქულისთვის ომია საჭირო. ჰოდა, "ბარსაც" კარგად იბრძვის.
პირველი ტაიმი
უფრო მეტად მომეწონა პირველი ნახევარი, ალბათ იმიტომ, რომ ბურთი უმეტესად "ბარსას" ჰქონდა. მეორე ტაიმში კი უპირატესობა დათმეს. ძირითად შემადგენლობაში ორი რამ უნდა გამოვყოთ - პირველი ის რომ ისევ ითამაშა მძვინვარე კაპიტანმა სერჟი რობერტომ, ეს ალბათ ბოლო იყო, შეგვიძლია დავითვალოთ კიდევ როდის დაიწყებს ძირითადში.
მეორე გამოსაყოფი ამბავი იამალის გამწესებაა თერთმეტეულში, როგორც ვივარაუდეთ მან დაიწყო და არა სასჯელმოხდილმა რაფინიამ. კიდევ უფრო მეტად უნდა გავუსვათ ხაზი იმას, რომ ფერანმა შეცვალა და არა ბრაზილიელმა. კიდევ იმასაც დავამატებთ, რომ ჟოაუ დაგვეატა და დაანონსებული კონფლიქტი რაფინიასა და ჩავის შორის არც ისე შორს არის. ეგეთი ხასიათი აქვს, ვერც სკამზე ჯდომას აიტანს და არც საკმარისი ტვინი აქვს, რომ შეცდომებზე ისწავლოს.
იმედი მაქვს ეს ჭირვეულობა სიმტკიცეში გადაიზრდება.
ბავშვი აქტიური იყო, ტრადიციულად, მაგრამ წინა მატჩების მსგავსად გოლის გატანის კარგი შანსი არ ჰქონია. არც ბევრი მომენტი შეუქმნია, მისი საუკეთესო თამაში არ ყოფილა. რა თქმა უნდა, ყველა მატჩს ერთ დონეზე ვერ ითამაშებს, მთავარია ზრდა განაგრძოს და ბევრი იმეცადინოს.
დიდად გამოსაყოფი არავინ ყოფილა, ფრენკი დე იონგის გარდა, ჩემს მსგავსად თქვენმა, (ანუ მკითხველთა) უმრავლესობამაც ივარაუდა რომ დე იონგი გახდება სეზონის საუკეთესო ფეხბურთელი, ჯერ ძალიან ადრეა ამაზე, მაგრამ მოლოდინის აღსაწერად გამოგვადგება, დიდი მოლოდინი გვაქვს და საწყის ეტაპზე ამართლებს, ძველი ნიდერლანდული სკოლა დააბრუნა "ბარსელონაში", რაღაც "აიაქსური", სასიამოვნოა ამ კაცის თამაშის ყურება. თავი მუშაობს, ყველაფერი რიგზეა.
კიდევ ერთ პროგნოზია გასახსენებელი. როგორც ვივარაუდეთ ილქაი და ფრენკი გამოირჩნენ, ერთს ჩაეწერა პლუსი, მეორეს არა, გიუნდოგანის ჩაწოდების შემდეგ კუნდემ ანგარიში გახსნა, დე იონგის პასის შემდეგ კი ლევანდოვსკი იყო ერთი-ერთზე და წააქციეს. მოკლედ, მთავარი მეპასეები ეგენი არიან და ამ შეხვედრაში გააკეთეს თავისი საქმე.
მეორე ტაიმი
შედარებით ცუდი იყო. გოლიც მივიღეთ, ისე დაარტყა იმ კაცმა რომ შტეგენსაც კი არ ჰქონია შანსი. ესე იგი, აუღებელი იყო. რა თქმა უნდა, დაცვა შეცდა. არ იმოქმედეს ზონური დაცვის პრინციპებით, ბალდე ცენტრალურ ზონაში გადმოვიდა და სხვები უბრალოდ თვალს ადევნებდნენ, არადა, ასეთ მოკლე მონაკვეთში სამ ფაზიანი დაცვა აბსურდია, საერთოდ არ არის საჭირო, ჯერ ბალდეს ბარიერი იყო, მერე რომეუს, მერე კუნდესა და კრისტენსენის. როცა მეტოქე ასე ახლოა კართან, მცველი უკვე უნდა შეხვდეს თავის ზონაში, პირველ რიგში, რომეუს ეხება ეს ყველაფერი. უბრალო სტატისტის როლში იყო, ამ ზონიდან თუ დარტყმა კარში წავიდა, საყრდენი სეპუკუს უნდა იკეთებდეს.
უპირატესობა დავთმეთ და გოლიც თითქოს ლოგიკური იყო.
დებიუტანტებიც არ უნდა დავივიწყოთ. კანსელუ გამოვიდა და ვნახეთ რა შეუძლია, მარტო ის ერთი პასი რად ღირდა?! როგორ გვაკლდა ასეთი მცველი.. სანაკრებო პაუზის მერე ეს უძლეველი ოთხეულიც უნდა ვიხილოთ. კონკურენცია კი როგორც ცენტრალურ მცველებს შორის, ასევე, ბალდესა და კრისტენსენს შორისაც იქნება. დანიელი თავს არ ირცხვენს, იქნება გარკვეული თამაშები, როცა მარცხნივ კანსელუს ვნახავთ, მარჯვნივ კი კვლავინდებურად კუნდეს, ან არაუხოს.
მაგალითად, მადრიდელებთან, ვინისიუსის წინააღმდეგ არ არის გამორიცხული რომ ისევ არაუხო ვიხილოთ. ესეც უპირატესობაა, კანსელუ ამის საშუალებას იძლევა.
ფელიშზე ჯერ ვერაფერს ვიტყვი.
ასე გავდივართ პაუზაზე, ეს ჩვენი ბიჭები თავიანთ ქვეყნებში წავლენ, ამათგან რამდენიმე კი სტუმრად გვეწვევა. იქნებ, იამალიც ვნახოთ მაგალითად აზაროვის წინააღმდეგ?! მერეც მოუწევთ, ჩემპიონთა ლიგაზე.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 27 ]