სეზონის პროგნოზები

სატრანსფერო ფანჯარა დაიხურა და მოვიდა ტრადიციული პროგნოზების დრო. ახლა უკვე შეგვიძლია, რაღაც დასკვნები გავაკეთოთ და ჩვენი მოლოდინიც ლოგიკური მსჯელობის საფუძველზე წარვმართოთ. 

წინა სეზონის მსგავსად ამჟამინდელი სატრანსფერო ფანჯარაც წარმატებულად შეგვიძლია მივიჩნიოთ. ეკონომიკურ კრიზისში მყოფი "ბარსა" ლაპორტას ხელში გაცილებით მაგარ ტრანსფერებს აკეთებს, ვიდრე მისი წინამორბედები მთელი მოღვაწეობის განმავლობაში. მხოლოდ მესის საკითხი აყენებს ჩრდილს ლაპორტას, მესის კი იმხელა ჩრდილი აქვს, რომ ეს ლაქა ცხოვრების ბოლომდე გაჰყვება. 

შევეშვათ ჭრილობებს. 

წინა სეზონმა კი არა, ბოლო 6-7 წელია ვხედავთ, რომ მარჯვენა ფლანგზე სერიოზული პრობლემებია. ვერა და ვერ დაიძლია ეს პრობლემა და აგერ, ის კაცი მოვიდა, ვისაც კარგად ვიცნობთ, არ მოგვიწევს იმაზე მარჩიელობა, რა დონის ფეხბურთელია, ვიცით, რომ უმაღლესი დონის მცველია, მხოლოდ ადაპტირებაა საჭირო და მიმაჩნია, რომ ჟოაუ კანსელუ ამას შეძლებს. ჟორდი ალბას შემდეგ, (ალვესის დაბრუნებას არ ვიღებ მხედველობაში) "ბარსას" ასეთი კარგი განაპირა მცველი არ დაუმატებია. 

ორივე ფლანგზე ძლიერია, ორივე ფეხით კარგად თამაშობს, შეტევაში ძალიან კარგია, დაცვაში კარგად დგას, მოკლედ, იდეალურივით მოჩანს და ვნახოთ, რა გამოვა. არაუხომ და კუნდემ უნდა ამოისუნთქონ, აღარ მოუწევთ ფლანგზე თამაში. 

ამ ტრანსფერით შეიძლება ითქვას, რომ "ბარსას" ევროპაში ერთ-ერთი საუკეთესო დაცვა ჰყავს და თუ მეკარესაც მივათვლით, შესაძლოა, მსოფლიოში საუკეთესოც ვუწოდოთ - კანსელუ, არაუხო, კუნდე, ბალდე - ჯერჯერობით ასე იკითხება. კრისტენსენიც ჯანზეა და არც ინიგო მოსულა სკამის სახეხად. 

თუ დააკვირდებით, ლაპორტას მოსვლის შემდეგ გუნდი იცლება გაუგებარი, გუნდთან შეუთავსებელი ფეხბურთელებისგან. ბოლო ასეთი გაუგებრობა მცირე ხნის წინ წავიდა პსჟ-ში. შეუძლებელია, ამან დადებითი შედეგი არ მოიტანოს. 

ჰოდა, გავისროლოთ პირველი პროგნოზი. 

I. ვინ მოიგებს ლა ლიგას?  

წინა სეზონის დაწყებამდე პირველად ვივარაუდე, რომ "ბარსა" მოიგებდა, ბევრი ფაქტორის გათვალისწინებით ასე მივიჩნიე და მართალიც გამოვდექი. ახლაც ასე მგონია, მიუხედავად იმისა, რომ "მადრიდი" ბელინგემის დამატებით ძალიან გაძლიერდა, არა მგონია, მთელი სეზონი ისეთ დონეზე ჩაატაროს, როგორც დაიწყო. "ბარსა" კი ეტაპობრივად მოუმატებს. ასეთი დაცვით წესით ბევრი ქულა უნდა დავაგროვოთ, შესაძლოა, თამაშის ხარისხი ვერ იყოს ყოველ ჯერზე საუკეთესო, მაგრამ ქულებს მოიტანს. 

მოლოდინი ასეთი მაქვს - ჩემპიონი ისევ "ბარსა". 

II. რამდენი ტიტულით დაასრულებს სეზონს? 

კვლავინდებურად ორი ტიტულის მოლოდინი მაქვს. წინა სეზონში "ბარსამ" ლა ლიგასთან ერთად სუპერ თასიც მოიგო. ახლა მგონია, რომ კოპა დელ რეი უნდა დაგვიბრუნდეს. სუპერ თასიც ერთი ხელის გაწვდენაზე იქნება. მე უფრო სამეფო თასისკენ ვიხრები და ვნახოთ, რა და როგორ მოხდება. 

რაც შეეხება ჩემპიონთა ლიგას, ამჯერად გაგვიმართლა და მარტივ ჯგუფში მოვხვდით. წინა წლის ჯგუფთან შედარებაც არ არის. ლაპორტა ბედნიერია, ჯგუფური ეტაპის დაძლევისთვის ბონუსები შემოვა, "ბარსა" მესის შემდგომ ეპოქაში პირველად გავა ჯგუფიდან. მაქსიმუმი ნახევარფინალი მგონია, დიდი მნიშვნელობა ექნება წილისყრის შედეგებს. ამჯერად ჩვენი გუნდი არ არის "ბაიერნისა" და "სიტის" დონეზე, კიდევ მოიძებნებიან გუნდები, რომლებთან თამაშიც მაგრად გაჭირდება, ჩვენს ახალგაზრდებს ჯერ პლეი ოფში არ უთამაშიათ, ეს კი დიდი ნაკლია, რომელიც ნელ-ნელა უნდა აღმოიფხვრას. 

2 ტიტული - ლა ლიგა, კოპა დელ რეი. 

III. საუკეთესო ტრანსფერი 

ძალიან მინდა, რომ ჟოაუ ფელიში იყოს საუკეთესო, გუნდს ყველაზე მეტად ეს წაადგებოდა, შეტევაში არსებული პრობლემების გათვალისწინებით, მაგრამ არა მგონია, ასე მოხდეს. ყველაზე სტაბილური ალბათ მაინც გიუნდოგანი იქნება. სარგებელს მისგან უკვე ვხედავთ, წესით კიდევ უფრო უნდა მოუმატოს და ერთ-ერთ საკვანძო ფიგურად იქცეს. 

ჩემი ხმა ილქაის. 

IV. სეზონის საუკეთესო ფეხბურთელი

წინა წელს თუ ულაპარაკოდ ლევანდოვსკის ვიტყოდი, ახლა ასე მარტივად არ არის საქმე. პოლონელი რეგრესირებს, რა თქმა უნდა, რაღაც მომენტში მოუმატებს, მაგრამ სეზონის საუკეთესო ფეხბურთელობას არა მგონია, შეწვდეს. სამი ძირითადი კანდიდატი მყავს  - შტეგენი, არაუხო და დე იონგი. 

ამჯერად ნიდერლანდელს ვიტყვი, მისი პროგრესის შემხედვარე. წინა სეზონი ძალიან კარგი ჰქონდა, ახლა კიდევ უფრო მეტს ველი. 

V. სეზონის იმედგაცრუება

გაჭირდება ამაზე პასუხი დემბელეს წასვლის შემდეგ. გუნდი იცლება ტროლებისგან. დემბელე წავიდა, ანსუ წავიდა, რობერტოს იმედი ისედაც არ გვაქვს, შესაბამისად, ვერც იმედგაცრუება იარსებებს. 

ახლა მოკლე მონაკვეთში რომ მიწევდეს თქმა, ლევანდოვსკის ვიტყოდი, მაგრამ ეჭვი არ მეპარება, რომ მოუმატებს. ამიტომ, რთული ხასიათისა და ბავშვთან კონკურენციის გამო, რაფინიას ვიტყვი. კარგი მატჩები მასაც ექნება, მაგრამ ამ კონკურენციაში არა მხოლოდ იამალთან, არამედ ფერანთან და ფელიშთან, მგონია, რომ დაიჩაგრება. პირველ რიგში, იმიტომ, რომ წნეხს ვერ უძლებს, მასსა და ჩავის შორის კონფლიქტი გარდაუვალი მგონია. 

ჩემი ხმა რაფინიას. 

VI. საუკეთესო ვეტერანი 

სადღა არიან?! "ბარსა" ძალიან ახალგაზრდა გუნდია. შტეგენს მე ვეტერანად არ ვთვლი, მეკარეებისთვის დრო სხვანაირად გადის. ამიტომ, მხოლოდ ლევანდოვსკი გვრჩება რეალურ კანდიდატად, ჰოდა, იყოს ლევანა. 

ჩემი ხმა პოლონელს. 

VII. საუკეთესო თინეიჯერი

დღეს რომ ვასახელებდე, იამალს ვიტყოდი. საერთოდ, ძალიან მინდა, ასეც მოხდეს. პედრის, გავის და ბალდეს უფრო მეტი შანსი უნდა ჰქონდეთ, მაგრამ აბა შეხედეთ, თუ საუკეთესო ტრანსფერი მართლა ილქაი იქნება, თუ საუკეთესო ფეხბურთელი მართლა დე იონგი გახდება, საიდან ექნებათ პედრისა და გავის იმდენი სათამაშო დრო, რომ საუკეთესო თინეიჯერები გახდნენ? 

კონკურენციაც ამას ჰქვია. 

არჩევანი ძალიან რთულია. უარს ვიტყვი რაციონალიზმზე და ემოციებს მივყვები. მაინც იამალს ვიტყვი. უფრო სურვილია, ვიდრე რეალური პოზიცია, მაგრამ იყოს ასე. 

ჩემი ხმა იამალს. 

VIII. საუკეთესო ბომბარდირი 

მიუხედავად ყველაფრისა - ლევანდოვსკი. 

IX. საუკეთესო ასისტენტი

ილქაი გიუნდოგანი. 

X. შემტევების ქრონოლოგიური სტატისტიკა 

ესეც ვთქვათ, ვისგან რამდენ გოლს ველით. დავიწყოთ იმით ვისგანაც ყველაზე მეტს ველით და ჩამოვყვეთ ნელ-ნელა ქვემოთ. 

• ლევანდოვსკი 
• ფერან ტორესი - ფელიში 
• იამალი
• რაფინია 

საბოლოო სურათი

• ჩემპიონი - "ბარსა" 
• რამდენი ტიტული - 2
• საუკეთესო ტრანსფერი - ილქაი
• საუკეთესო ფეხბურთელი - დე იონგი 
• იმედგაცრუება - რაფინია
• საუკეთესო ვეტერანი - ლევანდოვსკი
• საუკეთესო თინეიჯერი - იამალი
• საუკეთესო ბომბარდირი - ლევანდოვსკი
• საუკეთესო აისტენტი - ილქაი

დაწერეთ თქვენი პროგნოზები და ვნახოთ, რა იქნება სეზონის ბოლოს.