მატჩისშემდგომი მიმოხილვა: Gen Z ბარსელონურად
სულ უფრო ახლოს ჩემპიონობასთან. "ბილბაოსთან" გასვლაზე გამარჯვება დიდი ამბავია. ყოველთვის ძალიან რთულია იქ თამაში, თან დიდი გაიძვერა მწვრთნელი ჰყავთ, რომლის გაიძვერობის ამბავიც ძალიან კარგად ვიცით. ჩაიკუზება სადღაც პირით ხაზთან და ლეგენდის თანახმად ამ დროს ხედავს იმას, რასაც ვერავინ ხედავს დედამიწის ზურგზე.
მაშ, თუ ასეა საქმე, რატომ წავაგეთ სამარცხვონოდ "რომასთან" და "ლივერპულთან"? - იკითხავს დაკვირვებული მკითხველი. წავაგეთ იმიტომ, რომ არც "ოლიმპიკოზე" ჩაკუზულა და არც "ენფილდზე". თუ არ გჯერათ, თავიდან ნახეთ. ამაშია საქმე.
გუშინ კიდე რა ქნა არ ვიცი, ამდენადაც არ ყოფილა კამერა მისკენ მიმართული, უფრო საინტერესო რაღაცებს ვხედავდით და საბოლოო ჯამში ის ვნახეთ, რისი ნახვაც ყველაზე მეტად გვინდოდა - 0:1 ტაბლოზე.
არაუხოს გარეშე
ასეთი მატჩის მოგება მხეცის გარეშე აღსანიშნი ამბავია. გაჭირდა არაუხოს გარეშე, "ბილბაოს" უილიამსები ქარივით დაჰქრიან და ამ მატჩშიც მაგრად დაუბერეს. მარკოს ალონსო სულ ახალი გამოსული იყო, ისე ჩაუქროლა უილიამსმა ფილტვების ანთება აჰკიდა. გათანაბრდა კიდეც ამ დროს ანგარიში, მაგრამ VAR-მა გადაწყვიტა, რომ შელახული რეპუტაცია აღიდგინოს, ჰოდა, პატიოსნად განსაჯეს ეპიზოდი. იყო აქ დარღვევა, გოლიც გასაუქმებელი გამოდგა. წინა მატჩისგან განსხვავებით, (სადაც "ვალენსიას" პენალტი არ დაუდეს") გადაწყვეტილება სამართლიანი იყო.
მერე კიდევ მაგრად შემოგვიტიეს და თითქოს გოლიც გარდაუვალი იყო, მაგრამ ჩვენებიც მაგრად დადგნენ, შტეგენი კედელივით იყო და ამ ძელებსაც თითქოს მაგრად შეულოცა, თქვენც ჩემი დაცვა ხართ და აბა დამიცავითო. ჰოდა, მაშინაც კი ჩარჩოს ხვდებოდა ბურთი, როცა თითქოს გოლი გარდაუვალი უნდა ყოფილიყო.
ასე ნერვების თამაშით იღებს ჩავი 3 ქულას, უკვე მერამდენედ. ჩემპიონატს, რომ ბოლომდე მიიყვანს, კარგი კარდიოლოგი დასჭირდება, ფსიქოლოგიც და შესაძლოა, ფსიქიატრიც დასჭირდეს.
ლა ლიგაში უკვე მეცხრე მატჩი მოვიგეთ ანგარიშით 1:0. ანჩელოტის "მილანივით" ვართ. რას ნიშნავს ეს? ნიშნავს იმას, რომ გვეღირსა და კარგი დაცვის ხაზი შევკარით. გადასარევი. ასევე, ნიშნავს იმას, რომ შეტევა მისახედია, თანაც, მნიშვნელოვნად.
ეს გიჟი ბავშვი..
Gen Z აქტუალურია, ჩვენ რომ Gen Z-ი გვყავს აბა ეგეთი ვის ჰყავს? პედრით დაწყებული, არაუხოთი გაგრძელებული და გავით დამთავრებული. შეშლილი ბავშვი. ისევ დანის პირზე ირბინა. თავიც ის კიდური ჰგონია, რომლითაც ბრძოლაში უნდა შევიდეს. დაუშვილის მორაგბის საცავი ალალი იქნებოდა. თავის დროზე, კარლეს პუიოლს ეკეთა ნიღაბი, სახის ძვალი დაიზიანა, მერე მისი ნიღაბი მესის წაუღეს დუბლებში, ყვრიმალი ჰქონდა გაბზარული, გავის კიდე ჩაფხუტი სჭირდება.
ვწერდით მის სადებიუტო მატჩზე "ლა მასიაში", ცხვირი გაიტეხა და კბილი ჩაიმტვრია. პირდაპირ სახეში მოხვდა ტერფი და იმის მერე არ შეუწყვიტავს ბრძოლაში ასე შესვლა. მამაცი გულია, ოღონდ ბევრად ტექნიკური, ვიდრე ჯენარო გატუზო, აი, ვნახოთ, თეთრი ედგარ დავიდსი უფრო უხდება.
ფრენკი დე იონგი ოქრო კაცია. პირველ ტაიმში ბრწყინვალე პასიც გვაჩუქა, ლევანდოვსკი დატოვა მეკარესთან პირისპირ, მაგრამ ლევის უთამაშებლობა დაეტყო, სიტუაცია სწორად ვერ შეაფასა, ბოლო შეხება ცუდი ჰქონდა და მეკარემ დაასწრო. დიდი ხანია აღარ შეგვიქია, დიდი ხანია აღარ გავუკვირვებივართ მაგარი გოლით. დააკლდა დემბელე და პედრი. მისი მთავარი მომმარაგებლები ეს ფეხბურთელები იყვნენ.
სერხიო ბუსკეტსმა კი საგოლე პასი მიითვალა. დიდებული პასი იყო. გიგზის პასს წააგავდა ოუენზე, მანჩესტერულ დერბიში. ყველა ანთებულია ბურთის დასათრევად და ამ დროს სრულიად მშვიდი ბუსკეტსი იდეალურ პასს აკეთებს რაფინიაზე. მილიმეტრებში ზომას დროსა და სივრცეს. მერე მისი გაზომილი VAR-მა გაზომა და გოლი ჩათვალა.
კარგი იყო კაპიტანო.
შემტევები
ამასობაში რაფინიამ მოაგროვა საგოლე პასებიც და გოლებიც. დემბელეს არყოფნა წაეხმარა ამ ამბავში და ფაქტია, რომ არ შეურცხვენია თავი. რა თქმა უნდა, შორს არის იმ გარემარბისგან, რომლის ხილვაც გვსურს ძირითად შემადგენლობაში, მაგრამ გუნდისთვის სარგებელი მოაქვს. "ბარსა" ქულებს აგროვებს და ჩემპიონობისკენ მიიწევს.
კარგი გოლი შეაგდო, მარჯვენა ფეხით არ არის მარტივი ასე გატანა, ცაცია კაცისთვის.
ლევიზე ვთქვით და სხვებზე რა უნდა ითქვას აღარც ვიცი. ფერანი და ფატი ორი იმედგაცრუებაა. ორივეს ჰქონია ამ სეზონში გამობრწყინება, კარგი გოლებიც გვინახავს, ეფექტური თამაშიც, თუმცა, ვერ არის საკმარისი. რაფინიას რომ ვერ აჯობებ, ესე იგი, პრობლემები გაქვს.
იმედია დემბელე მალე დაბრუნდება - ნახეთ რა წინადადებაა? დემბელეს დაბრუნებას ვითხოვთ.
დანარჩენი მერე ითქვას, ზაფხულისთვის. რომ დაცხება და ფანჯარა გაიღება. გავხედავთ ვინმე ნიჭიერს, დავუძახებთ და იქნებ ინებოს ჩვენთან ამოსვლა. გვარი კიდე ისეთი ისმის, ყველას ჭკუიდან გადაგვიყვანს ეგ ამბავი რომ ახდეს, შანსი კი ცოტაა, ძალიან ცოტა.
შემდეგი მატჩი კლასიკოა!!!!
ფინალისკენ გვაქვს გზა.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 23 ]