მანჩესტერამდე - პირველი რაუნდის ვიდეოანალიზი
სანამ ლაპორტა მესის ისტორიული დაბრუნების ამბავს აგვარებს და "ბარსა" მეორე რაუნდისთვის ემზადება, მანამდე პირველ შეხვედრას გადავხედოთ.
პრესინგი
პირველი, რაც აღფრთოვანებას გამოიწვევს, პრესინგის უმაღლესი ხარისხია, რამაც გოლიც მოიტანა "მანჩესტერის" კარში. ფაქტობრივად რამდენიმე წამში იბრუნებს "ბარსა" ბურთს, მას შემდეგ, რაც "მანჩესტერს" შეჰყავს თამაშში. საინტერესოა ტაქტიკაც, - 3-2-3-2 ასე არის განლაგებული "ბარსა" პრესინგის დროს.
არაუხო-კუნდე-ალონსო
დე იონგი-კესიე
რაფინია-პედრი-ალბა
გავი-ლევანდოვსკი
გავის თამაში ლევანდოვსკის გვერდით მაღალ პრესინგზე ძალიან კარგად ნაფიქრი ამბავია და უმეტესად შედეგიც მოაქვს, ვიდეოშიც მშვენივრად ჩანს ეს ყველაფერი.
რაშფორდი
ვერ ვიტყვი, რომ დაცვაში გუნდმა ცუდად ითამაშა, ან განსაკუთრებული შეცდომები დაუშვა. იყო მცირე შეცდომები, რაც გოლის გასაშვებად საკმარისი გამოდგა, მაგრამ საერთო ჯამში, საგანგაშო არაფერი ყოფილა.
რაშფორდმა ალონსო სისწრაფეში ძალიან დაჩაგრა. კუნდე კი ინდივიდუალურად ცდებოდა, ეს იყო და ეს. ყველაზე მძიმე სანახავი თამაშგარე მდგომარეობის ხაზის კატასტროფული დარღვევა იყო. საქმე ის არის, რომ თამაშგარეს ყოველთვის ცენტრალური მცველი ქმნის, განაპირა მცველმა ყოველთვის მის ხაზზე უნდა იმოძრაოს, ჩვენ კი ერთ ეპიზოდში ვხედავთ, რომ კუნდე და ალონსო თამაშგარე მდგომარეობაში ტოვებენ ვერგჰოსტს, ალბა და არაუხო კი ცენტრალურ მცველებზე უკან იმყოფებიან, - ეს ძალიან დიდი მინუსია.
საბოლოოდ, ეს მომენტი გაფუჭდა. "ბარსა" გადარჩა. შტეგენმა გადაგვარჩინა.
გაშვებული გოლები
გოლები ინდივიდუალურ შეცდომებს მოჰყვა. პირველი გოლი რეჟისორებს გამოეპარათ, ეპიზოდი გვიან დაიწყეს, მხოლოდ საგოლე პასიღა ვნახეთ, მაგრამ შეტევა როგორ წამოვიდა, არ გვინახავს. თურმე, ფრენკი შეცდა, ზურგსუკან დატოვა კაცი, სივრცე გაიხსნა და რაშფორდი რომ ალონსოს სისწრაფეში ჩაგრავს, უკვე აღვნიშნეთ. შტეგენი შეცდაო, ითქვა, შტეგენი ამ შემთხვევაში ბოლო იმედი იყო, ჩვენ კი საწყისი ეტაპი გვაინტერესებს, ვიდეოანალიზის აზრიც ეს არის.
ბარსას შეტევები
შეიქმნა კარგი მომენტები სტანდარტებიდან, მაგრამ ნაკლებად საინტერესოა. მეტოქის შეცდომას უფრო უსვამს ხაზს, პირველი გოლიც ასე გავიდა და კიბატონო, შევავლოთ თვალი ალონსოს მოძრაობას.
მაგრამ, სხვა მომენტები მაინც გამოსარჩევია, სადაც ორივეჯერ ალბა მონაწილეობს. ჩავის ტაქტიკა იძლევა იმის საშუალებას, რომ მარცხენა ფლანგელი ცარიელ სივრცეში დარჩეს, ბალდეც კარგად აითვისებდა ამ მანძილს, თუმცა, გოლი არცერთ შეტევას არ მოჰყოლია, არც ჩვენ დაწყებულ ძალიან კარგ კომბინაციას და არც ისევ და ისევ, პრესინგით დაწყებულ შეტევას.
მანჩესტერთან გასვლაზე კი მაგრად გაჭირდება, დანაკლისი დიდია, ტაქტიკაც წესით და რიგით, მაგრად უნდა შეიცვალოს, ჰოდა, ვნახოთ რა გამოვა.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 8 ]