როგორ გავაქროთ მცველი - ერთი ფინტის ევოლუცია
ისევ გააკეთა!
წინა მიმოხილვებში მეტ დროს ვითხოვდით მემფის დეპაისთვის, ერთი მხრივ ფატიზე და ტორესზე კარგ ფორმაშია, თამაშისა და გოლების წყურვილს უფრო მეტად ავლენს, მეორე მხრივ კი უკეთესი მოსამზადებელი ეტაპი გაიარა, სადაც ერთი შედევრიც შექმნა. გაყიდვა უნდდათ და ვერ გაყიდეს, ბოლომდე იბრძვის ძირითადისთვის, როგორც იქნა შანსი მიეცა და გოლიც შეაგდო, თან რა გოლი! ისევ იგივე ფინტი გამოიყენა, რაც "ინტერ მაიამისთან" ვნახეთ.
მე კი ერთი-ორი გოლი გამახსენა. ერთი რომარიოს, ხოლო მეორე სამუელ ეტო'ოს შესრულებით. ამ სამი ფეხბურთელის შესრულებულ მოძრაობაში არის სხვაობა, თუმცა მაინც ძალიან ჰგავს ერთმანეთს.
რომარიომ გაუტანა "მანჩესტერს", ამ ფინტს ისე ასრულებს რომ ბურთს არ ეხება, გრძელი პასი იდეალურად დაამუშავა, ფეხის უკან-წინ მოძრაობით მცველი გააქრო და გარი ვოლშის კარის ბადე შეარხია.
დაახლოებით 10 წლის შემდეგ იგივე ვნახეთ სამუელ ეტოოსგან, კამერუნელმა "ვილიარეალს" გაუტანა, აქ სხვაობა ის არის, რომ ეტო'ო ბურთთან ერთად ასრულებს მოძრაობას, იგივე მიმართულებით, ჯერ უკან, მერე წინ. მცველი ტყუვდება, დარტყმა კი იდეალურია.
გავიდა დაახლოებით 15 წელი და დეპაიმ კვლავ მცირედით შეცვალა ეს ფინტი, ნიდერლანდელმა მიმართულებას უცვალა მხარე, ის პირიქით აკეთებს მოძრაობას, ჯერ წინ, მერე უკან. შემთხვევითი არ არის, რომ "ინტერ მაიამისთან" პასი ალბამ მისცა, "ელჩესთან" კი ბალდემ, საქმე ის არის, რომ როცა მარცხენა მცველი ფლანგზე ბურთს იღებს, დეპაი უკვე ემზადება ამ ფინტისთვის, ირჩევს პოზიციას, აკონტროლებს მცველს, ითხოვს ბურთს და მერე ყველაფერი ტექნიკის ამბავია.
ლამაზია ღმერთმანი.
დეპაი მეტ დროს იმსახურებს.
პ.ს: ვიდეოში გამოყენებულია ლალიგის კონტენტი, მის სანახავად, შესაძლოა იუთუბზე მოგიწიოთ გადასვლა.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 23 ]