ჯერ მწვრთნელი, მერე ტრანსფერები
სანამ UEFA ძირს გვითხრის პრეზიდენტმა და მთელმა გუნდმა მუშაობა უნდა განაგრძონ, რთულია ამ დროს კონცენტრირება, როცა იცი, რომ, შესაძლოა ჩემპიონთა ლიგის გარეშე დაგტოვონ, ან ამდენ ვალებში ჩაფლულს კიდევ ჯარიმა დაგამატონ თავზე, მაგრამ ასეა გრანდების საქმე, ყოველთვის რამდენიმე მიმართულებით გიწევს ბრძოლა.
შედგა შეხვედრა პრეზიდენტსა და მწვრთნელს შორის, მაგრამ ბევრი არაფერი გარკვეულა, რაღაც თემები გაიარეს, მაგრამ ეს არ ყოფილა იმისათვის საკმარისი, რომ გადაწყვეტილება მიეღოთ, საერთოდ, ისე ჩანს, რომ კუმანს ტოვებენ, რადგან ლაპორტას ფავორიტი მწვრთნელებიდან ყველა ხელიდან გამოეცალა, ტენ ჰაგი ფეხს არ იცვლის ადგილიდან, ფლიკი ოფიციალურად დაინიშნა გერმანიის ნაკრებში, ნაგელსმანი ოფიციალურად დაინიშნა ბაიერნში და დარჩა ორი გერმანელი - კლოპი და ლიოვი.
კლოპი ჩემპიონთა ლიგაზე გავიდა, მას ჯერ კიდევ არ მოუსმენია გადავსებული „ენფილდისგან“ სამადლობელი იმისათვის, რომ 30 წლიანი ჯოჯოხეთი დაასრულა, ამიტომ, არ ჰგავს „ლივერპულის“ დამტოვებელს, მით უმეტეს, ვალებში და ქაოსში ჩაფლული კლუბის გამო.
ლიოვზე კი არ ღირს გაგიჟება, კაცმა არ იცის საკლუბო ფეხბურთს როგორ მოერგება.
Mundo Deportivo დაუჯერებელ ინფორმაციას ავრცელებს, თურმე ლაპორტას ერთ-ერთი კანდიდატი ფრანკ რაიკაარდია, რომელსაც 2013 წლის შემდეგ არ უმუშავია, ჩავისთვის კი მხოლოდ მეორე გუნდის სავარძელი ემეტება, თუ ლაპორტა დროს წელავს, მხოლოდ გვარდიოლას გამო, ყველა ელის ფინალს და მერე იქნებ გაახერხოს რამე, მაგრამ ესეც წარმოუდგენელი ჩანს, კაცი ცრემლად დაიღვარა აგუეროს გაშვებაზე, დაბრუნებას, რომ აპირებდეს სატირალი რა ექნებოდა?!
აი, სწორედ ამიტომ, კუმანის შანსები დიდია, არ მგონია მისი დატოვება სწორი იყოს, პირველ რიგში იმიტომ, რომ ცენტრალურ მატჩებს თავი ვერაფრით გაართვა, „ატლეტიკოს“ კი ჩემპიონობის ბილეთი გადასცა, არადა ჯერ კიდევ დასაწყისში ვამბობდით, რომ ამას აუცილელად ინანებდა, აბა როგორ უნდა ვენდოთ მწვრთნელს, რომელიც ვერ იგებს იმას, რასაც უბრალო გულშემატკივარი მარტივად ხვდება?!
კუმანის არგუმენტი
კუმანს კამათი არ ეზარება, არც ჩხუბი, უცბად ცხვირიდან სისხლი თუ არ წასკდა, ჯიუტად დაიცავს თავის პოზიციას, რომ სათანადო ფეხბურთელები არ ჰყავს, ვერ მოუყვანეს ის ხალხი ვინც სურდა, ახლა კი იცის, რომ მარტივად მიიღებს დეპაისაც და ვეინალდუმსაც, პლუს აგუეროს, რომლის ბედიც უკვე გადაწყვეტილია, ყველას უფასოდ გადმოიბირებს, არც ერთი არ იქნება მეგა ტრანსფერი, მაგრამ, „ბარსა“ აუცილებლად გაძლიერდება.
მისი მეორე არგუმენტი ახალგაზრდებთან სწორი მუშაობაა, მაგრამ არა ყველასთან, პუჩი გაახმო ნატრვრის ხესავით, აწი რაც არ უნდა თხოვოს არაფრის შანსი არ ექნება. მიუხედავად ამისა, მოლაპარაკებები მიმდინარეობს, ჟოანი არ ჩქარობს, წინ ძალიან ცხელი ზაფხულია, სანამ სანაკრებო ფეხბურთი გაჩაღდება, მანამდე UEFA ზვიგენივით დაგვიწყებს დევნას, სატრანსფერო ბაზარზე კი ფეხბურთელების გაყიდვა უფრო გაგვიჭირდება, ვიდრე გადმობირება.
ჯერ მწვრთნელი..
არ ღირს 2-3 ფეხბურთელის შეთანხმება იქამდე, სანამ მწვრთნელს არ გაიფორმებ, სკამზე დასასმელი მილიონერების მეტი რა გვყავს?! კიდევ ერთი არაფერში გვჭირდება, ვინც არ უნდა იყოს, თუნდაც კუმანს ტოვებდნენ, ჯობია, რომ სწრაფად მოგვარდეს ეს ამბავი და მეტი დრო დაუთმონ გუნდს დაკომპლექტებას, თორემ მოვა ვინმე მოულოდნელი და იტყვის იმ ნაცნობ სიტყვას - ჩემს გეგმებში არ შედის! ჰოდა, გვიანი იქნება.
აგერ Marca-მ არტეტაც გაგვახსენა, ალბათ ძალიან უნდა მადრიდულ გამოცემას, რომ არტეტა მოვიდეს, როგორც წესი, სათადარიგო მწვრთნელები მასწავლებლებს ვერ ჯობნიან, „რეალმა“ კეირუში წაიყვანა, ამდენი წელი ფერგიუსონთან ერთად იმუშავა და იქნებ რამე მაინც ისწავლაო, მაგრად უსწავლია!
ვილაშ ბოაში მოურინიოს თანაშემწე იყო, „პორტუში“ მის მსგავსად დაიწყო მთავარი მწვრთნელობა, მის მსგავსად გადავიდა „ჩელსიში“ და ლონდონის სამი მეფე სკამზე დასვლა, დროგბა, ტერი და ლამპარდი, ამას უმწიფარი კი არა, მხოლოდ გიჟი თუ გააკეთებდა, ისე მოწყურდათ ბიჭებს თამაში, ბოაშის გაშვებისთანავე გამოვარდნენ მინდორზე და ჩემპიონთა ლიგა მოიგეს, ნახევარი სეზონი სკამზე იყვნენ და დასვენებულებმა ყველას მოუგეს.
ახლა კიდე არტეტაო, გვარდიოლას თანაშემწე ყოფილა, და რა მერე? არც არაფერი, ხაზავს და წვალობს რაღაცებს „მეთოფეებში“.
ამ ყველაფრის შემხედვარე, ცოტა უცნაურია ჩავის მიმართ ასეთი უნდობლობა.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 16 ]