ხომალდი კაპიტნის გარეშე
ყველაფერი უნდა დავიწყოთ თავიდან! - იყო მაშინ ასეთი გზავნილი, მოვიდა ჰოლანდიელი მწვრთნელი, რომელმაც გუნდის ლიდერზე უარი თქვა და უფასოდ გაუშვა კლუბიდან, არადა, სულ რაღაც ერთი წლის წინ, იმხელა ფასი ედო, რომ ვერც ერთი კლუბი ვერ გაწვდებოდა.
ვერავის წარმოგვედგინა "ბარსა" დიდი ათიანის გარეშე, რადგან ყველაფერი მასზე იყო დამოკიდებული. როცა გუნდს საქმე კარგად არ მიდიოდა, მისი გოლები და პასები გვშველოდა. მერე კი უბრალოდ გაქრა.
მომდევნო სეზონი კატასტროფული გამოდგა, "ბარსა" ჩემპიონატში მეექვსე ადგილზე გავიდა და ის მეექსვე ადგილიც ბოლო ტურში მოიპოვა, "ბილბაოს" დაკარგული ქულების ხარჯზე, თორემ ისე, მეშვიდეზე მიჩანჩალებდა.
ასეთი იყო ვან გაალის მოსვლა და რივალდოს წასვლა.
მესის შესაძლო წასვლას ვერ შეედრება, მაგრამ ის "ბარსელონა" ისეთივე წარმოუდგენელი იყო რივალდოს გარეშე, როგორც ეს "ბარსაა" წარმოუდგენელი მესის გარეშე. მაშინაც ახალი პროექტით მოვიდა ვან გაალი და იქნებ გულშემატკივართა რაღაც ნაწილს, კუმანზე დიდ მწვრთნელადაც მიაჩნია, ყოველ შემთხვევაში, უფრო ტიტულიანია, ჩემპიონთა ლიგის თასიც მოგებული აქვს და არც ფინალები ყოფილა მისთვის უცხო.
"ბარსა" ჩაფლავდა და ვან გაალი ჩემპიონთა ლიგის მეოთხედფინალიდან გამოვარდნის შემდეგ გაათავისუფლეს. ეს ის ეტაპია, რომელსაც რონალდ კუმანი არასდროს გასცილებია.
გუნდში ბევრი პრობლემა იყო, მათ შორის ერთ-ერთ სერიოზულ პრობლემას, გადაბერებულ ჰოლანდიელთა ჯგუფი წარმოადნედა, რომელიც ვან გაალმა არ გაწირა, სამაგიეროდ კრუიფის რჩევის შემდეგ, რაიკაარდმა გვარიანი წმენდა ჩაატარა და ის კაციც არ დაინდო, ვინც მისი პასის შემდეგ, "აიაქსს" უკანასკნელი ჩემპიონთა ლიგა მოაგებინა.
ასევე დიდი პრობლემა იყო ის, რომ მომავალ ათიანს ძალიან ბევრს თხოვდნენ და ფსიქოლოგიურად დაითრგუნა, რიკელმესთვის პრობლემა მხოლოდ ვან გაალი არ ყოფილა, ის ფანებმაც ვერ მიიღეს, ბევრი უსტვინეს და თავზეც წამოაძახეს, რომ "ათიანის" ტარების ღირსი არ იყო.
წარმოდგენაც არ მინდა, რამხელა წნეხი ელის იმას, ვინც მესის შემდეგ მოირგებს ათნომრიან მაისურს. არადა, ეს კლუბისთვის საკრალური ნომერია, რომლის გაუქმებაც არაფრით არ შეიძლება, მის მორგებას კი ამიერიდან დიდი გამბედაობა დასჭირდება, ახლა თუ მერე.. რა მნიშვნელობა აქვს?! ადრე თუ გვიან ვიხილავდით მომავალ ათიანს და უკმაყოფილების გრძნობასაც აუცილებლად დაგვიტოვებდა.
გუნდს არ ჰყავდა ლიდერი, მოგვიანებით რიკელმე იტყვის, რომ მას არ დაუთმეს ლიდერობა, არც უნდა დაეთმოთ, ეს თავად უნდა მოიპოვოს ფეხბურთელმა, ისე როგორც რონალდინიომ გააკეთა, პირველივე შეხვედრაში ყველას დაანახა, რომ ის იყო ფეხბურთელი, რომელიც გუნდს გამარჯვებისკენ გაუძღვებოდა.
ლიდერობა ვერ აიღო ვერც მენდიეტამ, რომელიც "ლაციოში" ცოდვლობდა, მაგრამ ყველას ახსოვდა რა დიდებულად კაპიტნობდა "ვალენსიას", ამ უნარების გამო იყიდა "ბარსამ", მაგრამ რიკელმეზე მეტი არც მას გამოსვლია რამე.
გუნდი ლიდერის გარეშე განწირულია. ყველა გუნდს სჭირდება გამორჩეული ფეხბურთელი, რომელიც მაშინ იტვირთავს ლიდერის ფუნქციებს, როცა ყველაზე კრიზისული პერიოდი დადგება. ვფიქრობ, ვინ შეიძლება იყოს ასეთი, ამჟამინდელ "ბარსელონაში" და რამდენიმე ფეხბურთელის გვარი ნამდვილად მომდის თავში, მაგრამ სიმართლე რომ ვთქვა, მათი ლიდერობისა არ მჯერა.
ვიცით, რომ გრიზმანი ლიდერობდა "ატლეტიკოს" და ლიდერობდა კარგად. მისთვის არ არის უცხო, როცა თამაშს საკუთარ თავზე იღებს და გუნდისთვის გამარჯვება მოაქვს. არა ერთხელ დამიწერია, რომ სანამ მესი მოედანზეა, მისი ადგილი "ბარსაში" არ იქნება-მეთქი, ახლა ისე ხდება, რომ მესი წასვლის ზღვარზეა და თუ რამის თავი აქვს პატივცემულ ანტუანს, სწორედ ახლა უნდა გვანახოს.
ვიცით, რომ კოუტინიო "ლივერპულის" კარგი ლიდერი იყო, მას შემდეგ რაც გუნდი სუარესმა და სტერლინგმა დატოვეს, სწორედ მან აიღო ეს ფუნქციები თავის თავზე და ისე კარგად წარმოჩინდა, რომ "ბარსას" ყველაზე ძვირადღირებული ტრანსფერი შეიქნა. ბევრს ისიც უთქვამს, ფლანგზე იმიტომ ათამაშეს, რომ ცენტრი მესის ჰქონდა ოკუპირებულიო, აი, მოვიდა ის დრო, როცა მასაც მიეცემა თავისუფლება, იქნებ სწორედ ის იყოს მომავალი ათიანი? მომთმენი ვიქნებით მის მიმართ, უნდა გვესმოდეს, რომ მესის ვერაფრით ვერ შეცვლის, მაგრამ 1-2 კარგი სეზონი თუ გვაჩუქა, ეგეც საკმარისი იქნება.
ვიღაც ძალიან მორწმუნეს, შესაძლოა დემბელეს იმედიც კი ჰქონდეს, ეჰ.. ნეტარ არიან მორწმუნენი, დემბელესგან ლიდერი არ დადგება, ლიდერი კი არა, იმედია ფეხბურთელი მაინც დადგება მისგან, ჯერჯერობით მხოლოდ "ფლეისთეიშენის" ოსტატი გვყავს გუნდში.
იყო დრო, როცა "ბარსა" მესის გარეშე იდეალურად თამაშობდა. მაგალითად გავრდიოლას ეპოქაში, როცა ჯგუფურ ეტაპზე, "ინტერთან" მესი არ გვყავდა, ნამდვილად არ ველოდი იმას, რაც ვნახე, "ბარსას" მესის არყოფნა საერთოდ არ შეტყობია, "ინტერი" დამაჯერებლად დაამარცხა და ბურთი ისე დაუმალა, რომ თერთმეტივე ფეხბურთელი ენაგადმოგდებული არბენინეს.
გავიხსენოთ 2015/16 წლების სეზონი, ლუის ენრიკეს "ბარსა", მესიმ ტრავმის გამო რამდენიმე შეხვედრა გამოტოვა, მაგრამ არაფერი გვიგვრძვნია, რადგან ნეიმარმა და სუარესმა წარმოუდგენლად მაღალ დონეზე ითამაშეს, მესი ზედ "კლასიკოს" წინ დაბრუნდა, მაგრამ სკამიდან დაიწყო, როცა მოედანზე გამოვიდა, ნეიმარის, სუარესისა და ინიესტას შოუს წყალობით, ანგარიში უკვე 3:0 იყო, "ბარსამ" "ბერნაბეუზე" იდეალურად ითამაშა და რომ არა პაკო ალკასერის საოცრად ცუდი თამაში ბოლო წუთებზე, ანგარიში 5:0 გახდებოდა და ლუის ენრიკეც განსაკუთრებული სიამაყით აღივსებოდა, რადგან "რეალს" "ბერნაბეუზე" დაამარცხებდა იმ ანგარიშით, რა ანგარიშითაც პეპმა დაამარცხა "კამპ ნოუზე", ამავე დროს ხუთბურთიან უპირატესობას დააფიქსირებდა და პეპის ოთხბურთიანს (6:2) გადაასწრებდა, მაგრამ ენრიკეს "ბარსას" აქილევსის ქუსლი სწორედ ეგ იყო, ფერნანდესის მოყვანილი ნაყარ-ნუყარი ფეხბურთელები.
უნდა გავიხსენოთ ვალვერდეს "ბარსა", რომელმაც ასევე მესის გარეშე ჩაატარა კლასიკო და "რეალისგან" ქვა ქვაზე არ დატოვა. მაშინ ლიდერობა კვლავ ლუის სუარესმა იტვირთა, "რეალს" ჰეთ თრიქი შეუსრულა და ტრიბუნაზე მყოფი მესიც აღაფრთოვანა.
ასეა საქმე, ლიდერია საჭირო, მაგრამ აღარც ინიესტა გვყავს, აღარც ნეიმარი და თუ მესი წავიდა, სუარესიც ზედ მიჰყვება.
სამწუხაროდ, დღევანდელ "ბარსელონაში" ამ რანგის ლიდერს ვერ ვხედავ, რაც შეიძლება, რომ დამღუპველი აღმოჩნდეს.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 14 ]