რა გვაჩვენა "ატლეტიკოსთან" შეხვედრამ
მატჩის მიწურულს, სამუელ ეტო'ო გამახსენდა, 2007 წელს, "რასინგთან" შეხვედრაში, კამერუნელმა უარი განაცხადა მოედანზე შესულიყო, უჟმურად გააქნია თავი და ერთი-ორი ტკბილი სიტყვაც ჩაილაპარაკა რაიკაარდის მისამართით.
მაშინ დიდი ამბავი ატყდა და ეტო’ოს არაპროფესიონალიც უწოდეს, მაგრამ კარგად ვიცით, რომ მასზე პროფესიონალი აფრიკელი, ალბათ, მეორე არ დაბადებულა. საქმე მის ხასიათშია, ყოველთვის მეტს ითხოვდა, მაქსიმალისტი და ამაყი იყო, რის გამოც თავი შეურაცხყოფილად იგრძნო და გააკეთა ის, რაც გააკეთა.
ეტო’ო არ ყოფილა ახალბედა ფეხბურთელი, რომელიც კლუბში დებიუტს ელოდა, მან ლიდერობა თავის შრომით მოიპოვა და რაც კლუბისთვის გაიღო, ყოველთვის იმავეს ითხოვდა.
არც ანტუან გრიზმანია ახალბედა. მართალია, მოედანზე თავი ვერა და ვერ უპოვია, მაგრამ მაინც ვარსკვლავია, რომელშიც 120 მილიონი ევროა გადახდილი.
გრიზმანი მოედანზე გავიდა და ამის გამო, ვიღაცების თვალში, ალბათ დიდი პროფესიონალიც შეიქნა, მაგრამ ჩემთვის კარგად გამოჩნდა კიდევ ერთი რამ - ის უკვე ყველაფერს შეეგუა, ვერ გამოდგა ისეთი ბრძოლისუნარიანი, როგორიც ეტო’ო იყო, არც მასსავით მაქსიმალისტია, არც მისი მსგავსი მენტალობა აქვს და ერთი რიგითი ფეხბურთელის სტატუსსაც შეეგუა.
იმ მცირე დროში, რაც მოედანზე გაატარა, სწორედ ეს გამოჩნდა, ანტუანი ფსიქოლოგიურად განადგურებულია და იმის თავიც აღარ აქვს, რომ ფერმერს ხმამაღლა შეახსენოს, თუ ვინ არის და რას წარმოადგენს.
როცა მწვრთნელი იდეალურად აკეთებს საქმეს და შენ ასეთ დღეში ხარ, ამ დროს პასუხი მოედანზე უნდა გასცე, მაგრამ როცა ფერმერი მწვრთნელი, გონზე არ არის რას აკეთებს და ამასთან ერთად, მოედანზე ისე შეჰყავხარ, თითქოს 16 წლის ღლაპი იყო, იქნებ ღირდეს, რომ მკაცრი სიტყვაც დაგცდეს პირიდან?!
ამ მოვლენაზე ყველას ერთი აზრი ვერ ექნება. მე კი მერჩივნა, რომ გრიზმანისგან სიბრაზე მაინც დამენახა, მერჩივნა დამენახა, რომ უბრალო ფეხბურთელის სტატუსს არ ეგუება, მაგრამ, სამწუხაროდ, მსგავსი არაფერი დამინახავს.
ცვლილება ტაქტიკაში
თამაშის წინ დაგვიხატეს 4-3-3, მაგრამ თამაშის მიმდინარეობისას გამოჩნდა, რომ გუნდი 4-3-1-2-ით თამაშობდა, გამთამაშებლის პოზიციაზე რიკი პუჩი ვიხილეთ, რომელსაც ცუდი შთაბეჭდილება არ დაუტოვებია, სხვადასხვა გამოცემების მიხედვით, საუკეთესოც კი იყო.
ბევრჯერ დაგვიწერია, რომ არსებულ სქემაში, ანუ სეტიენის 4-3-3-ში და ვალვერდეს 4-3-3-ში, ან 4-4-2-ში გრიზმანის ადგილი არ იყო, რადგან ვალვერდე ან გარემარბად ათამაშებდა, ან მარცხენა ნახევარმცველად, სეტიენი ასევე, ან გარემარბად აყენებს, ან ცენტრფორვარდად აყენებდა, სანამ სუარესი ტრავმას მკურნალობდა. გრიზმანი კი არც გარემარბია და არც ცენტრფორვარდი, მით უმეტეს, მარცხენა ნახევარმცველი, და აი, როგორც იქნა, სეტიენმა მოიფიქრა ტაქტიკა, სადაც გრიზმანი თავის პოზიციაზე თამაშს შეძლებდა, 4-3-1-2-ში, მესის შეეძლო ათიანის პოზიციაზე თამაში, სუარესი ჩვეულად, ცხრიანის პოზიციაზე ითამაშებდა და გრიზმანიც დადგებოდა მეორე ფორვარდად, მაგრამ ფერმერმა მთელი 90 წუთი, სკამზე დატოვა.
არ მგონია, რომ გრიზმანი თამაშის დაწყების შემთხვევაში, ციდან ვარსკვლავებს მოწყვეტდა, როგორც აღვნიშნე, მას უკვე ფსიქოლოგიური პრობლემები აქვს და ამის დაძლევას დრო და ძალისხმევა სჭირდება, სამწუხაროდ, გრიზმანს არც ერთი აქვს და არც მეორე.
მაგრამ თავის პოზიციაზე რომ გვენახა, ეს მისთვის სტიმულიც იქნებოდა და ჩვენც ასე თუ ისე გავიგებდით, ოდნავ უკეთ მაინც თუ შეძლებდა თამაშს, საერთოდ მოახერხებდა თუ ვერა, თავისი ადგილის პოვნას.
სეტიენმა ეს შანსი ქარს გაატანა და გრიზმანი რომ ხასიათს ავლენდეს, კონფლიქტიც მომწიფდებოდა, მაგრამ ანტუანი, ნიჭთან ერთად, ხასიათსაც ვეღარ ავლენს.
მოლოდინი
ფანების არ იყოს, ფეხბურთელებსაც ეტყობათ, რომ მათი მთავარი მიზანი, სამწვრთნელო გუნდის ცვლილებაა და არა ჩემპიონატის მოგება. სეტიენმა რამდენიც არ უნდა იძახოს, ყველაფერი კარგად არისო, ჩანს, რომ მისი წასვლა დროის ამბავია.
რაც მალე, მით უკეთესი, რადგან ჩემპიონთა ლიგის განახლებამდე, ჯერ კიდევ არის დრო, რომელიც "ბარსას" მომავალმა მწვრთნელმა, მაქსიმალურად ნაყოფიერად უნდა გამოიყენოს.
ამას ხედავს და გრძნობს ყველა, მაგრამ ბართომეუ არ იჩქარებს. მრჩება შთაბეჭდილება, რომ ფეხბურთელებს უდგას ჯინში, ბართომეუ ყველაფერს მათ აბრალებს, რისი დასტურიც არა ერთხელ გვიხილავს, ფეხბურთელები კი პირიქით, ყველაფერს მას აბრალებენ, ამიტომ, არც ერთი მხარე შანსს არ უშვებს ხელიდან, რომ ერთმანეთს დარტყმა მიაყენონ, საბოლოო ჯამში კი კლუბი ზარალდება, რომელიც ვეღარ ტოვებს გრანდის შთაბეჭდილებას.
ასეთი ჯიუტი ვირთხა, ცხოვრებაში არ მინახავს.
გემი იძირება და მაინც არ გარბის..
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 18 ]