არის თუ არა კიკე სეტიენის მოლოდინი რეალური?
ცოტა ხნის წინ Sport-თან ინტერვიუში ლეო მესიმ განაცხადა: "ჩვენს შემადგენლობაში ეჭვი არასდროს შემპარვია, მჯერა, რომ ყველა ტიტულის მოგება შეგვიძლია, მაგრამ ისეთი თამაშით, რასაც ამჟამად ვაჩვენებთ, ამის გაკეთება წარმოუდგენელია". "ბარსელონას" მთავარი მწვრთნელი, კიკე სეტიენი კი გუნდის კაპიტნის განცხადებას ასე გამოეხმაურა: "ვფიქრობ, ლეოს სიტყვებმა დიდი კამათი წარმოშვა. დარწმუნებულნი ვართ, რომ ჩემპიონთა ლიგის მოგება შეგვიძლია. რაღაცები უნდა გავაუმჯობესოთ, მაგრამ ეჭვი არაა, რომ ამის პოტენციალი გვაქვს".
პირველ რიგში, შეიძლება, ეს შემთხვევა მცირე გაუგებრობად ჩაითვალოს. მესი არ გულისხმობდა, რომ კლუბის ამჟამინდელი შემადგენლობა კონკურენტუნარიანი არაა, არამედ არგენტინელი ფიქრობს, რომ "ბარსას" რაღაცები შესაცვლელი აქვს. ეჭვგარეშეა, რომ მწვრთნელის ცვლილების დროს გუნდს ადაპტაციისთვის დრო სჭირდება. მიუხედავად ლა ლიგის სატურნურო ცხრილის სათავეში ყოფნისა, 61 წლის სპეციალისტი და კაპიტანი აცნობიერებენ, რომ სეზონის განახლების შემდეგ "ბლაუგრანამ" თამაშის ხარისხს უნდა მოუმატოს. რაც შეეხება კონკრეტულად ჩემპიონთა ლიგას, ამჟამად ფავორიტის დასახელება რთულია. ის ფაქტი, რომ "ლივერპული" ტურნირიდან სრულიად მოულოდნელად მადრიდის "ატლეტიკომ" გამოთიშა, იმაზე მიუთითებს, რომ წინასწარი პროგნოზების გაკეთება არც ისე მისაღებია. მეტიც, "იუვენტუსმა" პირველი მატჩი "ლიონთან" წააგო, "ლაიპციგმა" კი წინა გათამაშების ფინალსიტი, "ტოტემჰემი" გაანადგურა (ორი მატჩის ჯამში, 4:0). ასევე, მადრიდის "რეალს" მისსავე მოედანზე "მანჩესტერ სიტიმ" სძლია. ყველა ზემოთხსნებულის გათვალისწინებით, სიურპრიზებს ევროპის უპრესტიჟულესი ტურნირის განახლების (აგვისტოში) შემდეგაც უნდა ველოდოთ.
კატალონილები ჩემპიონთა ლიგის მერვედფინალის პირველი დაპირისპირების შემდეგ, გასვლაზე გატანილი გოლის გამო, უპირატესობას ფლობენ.
"ნაპოლისთან" იტალიაში გამართული შეხვედრა 1:1 დასრულდა. მასპინძლები დრის მერტენსმა დააწინაურა, თუმცა ანტუან გრიზმანმა ანგარიშის გათანაბრება მოახერხა და "ბარსელონა" ესპანეთში, ასე თუ ისე, სასურველი შედეგით დაბრუნდა. თუმცა, ცხადია, რომ ფანები, რომლემაც პირველ მატჩს უყურეს, ხვდებიან, რომ "ლურჯ-ბროწეულისფერებს" მეტი უნდა გაეკეთებინათ. გუნდში თავდამსმხელებს შორის მეტი შეთამაშებაა საჭირო, ასევე ნახევარდაცვის დომინირება და საიმედო დაცვის ხაზის ყოლა.
კიკე სეტიენსა და მის ასისტენტებს რთული მისია აკისრიათ. მათ ნამდვილად კარგი შემადგენლობა ჰყავთ, რომელსაც კარგი მოტივირება და გაწვრთნა სჭირდება. შესანიშნავი ფეხბურთელების ყოლას, მაქსიმალური პოტენციალის გამოვლენის გარეშე, აზრი არ აქვს. მაგრამ, კიკეს საკუთარი მოთამაშეების სჯერა და ერნესტო ვალვერდესგან განსხვავებით, ჩემპიონთა ლიგის მოგებაზე მტკიცე პრეტენზიას აცხადებს, რაც გულშემატკივრებს იმედს აძლევს. კატალონიური გრანდი აღნიშნული ჯილდოს მოგებას 5 წელია ელის. ბოლოს ეს ლუის ენრიკეს ფორმაციის "ბარსელონამ" მოახერხა.
ყველაფრის მიუხედავად, "ბლაუგრანას", სხვა გრანდებისთვის კონკურენციის გასაწევად, შემდეგი მიმართულებები სჭირდება:
1. დაცვითი ფუნქციების გაძლიერება
წინა სეზონისგან განსხვავებით, "ბარსას" უკანა ხაზში ბევრი პრობლემაა. გარკვეულწილად, ეს იმის ბრალია, რომ ჟერარ პიკემ და კლემან ლანგლემ იდეალური დუეტი ვერ ჩამოაყალიბეს. 33 წლის მცველის მხრიდან არასაფეხბურთო საქმიანობა ყველას მოეხსენება; რაც შეხება ფრანგს, აღნიშნულ სირთულეებს მხოლოდ კლემანი ვერ გადაჭრის. მარცხენა ფლანგზე, ერთადერთი ღირსეული ვარიანტი ჟორდი ალბაა, ჟუნიორ ფირპო კი, ჯერჯერობით, ავანსებს ვერ ამართლებს. იდეალურად არც მარჯვენა ფლანგი გამოიყურება, რადგან ნელსონ სემედუ და სერჟი რობერტო არასტაბილურად გამოიყურებიან. დაცვის ცუდ თამაშზე ბოლო "ელ კლასიკოში" (0:2) გაშვებული გოლიც მიუთითებს, სადაც პორტუგალიელი ფლანგელი პოზიციურად შეცდა, რის გამოც ვინისიუს ჟუნიორმა კატალონიელთა საჯარიმოში შეღწევა მოახერხა. "რეალთან" დაპირისპირების მსგავსად, ბევრი შემთხვევა დაფიქსირდა, როცა უკანა ოთხეული ცუდად ასპარეზობდა, თუმცა, საბედნიეროდ, "ბარსას" მარკ-ანდრე ტერ შტეგენი ჰყავს, რომელსაც არაერთი ურთულესი და გადამწყვეტი სეივი განუხორციელებია.
სეტიენის პირველი ამოცანა ამ პრობლემის მოგვარება იქნება. სამწუხაროდ, კიკეს ბევრი ვარიანტი არ აქვს, თუმცა სავარჯიშო სესიებზე მან მცველები შესაბამისი დარიგებებით უნდა უზრუნველყოს. მაგრამ, საკითხავია, 61 წლის სპეციალისტი ამას თავს რამდენად გაართმევს, ვინაიდან, ეს ასპექტი მისი ძლიერი მხარე არაა. მეტიც, "ბეტისში" ყოფნის პერიოდში, დაცვის ცუდად ასპარეზობის გამო, კლუბის ხელმძღვანელებმა, ედერ სარაბიას სახით, უკანა ხაზს ცალკე მწვრთნელი დაუნიშნეს. ეს პიროვნება დღეს "ბარსელონაში" კიკეს ასისტენტია.
2. თავდასხმის პროდუქტიულობის გაზრდა
შემტევების ცუდი თამაშის პირობებში, ლეო მესი მაინც შესანიშნავად გამოიყურება, თუმცა დიდი წარმატებების მისაღწევად ერთი ფეხბურთელი საკმარისი მაინც არაა. ერნესტო ვალვერდეს ხელში, გუნდის მთავარი პრობლემა სტუმრად ჩატარებულ შეხვედრებში გოლის გატანა იყო. აშკარაა, რომ მხოლოდ ლეო მესიზე დამოკიდებულება "ბარსელონას" არ წაადგება. ლუის სუარესი ჩემპიონთა ლიგაზე ცუდად გამოიყურება, ანტუან გრიზმანმა კი ახალ კლუბთან ადაპტაცია ბოლომდე ჯერ ვერ გაიარა. კორონავირუსის პანდემიის "წყალობით" საფეხბურთო სეზონის შეჩერებამ, ლუის სუარესსა და უსმან დემბელეს საშუალება მისცა, სეზონის დარჩენილ ნაწილში მონაწილეობა მიიღონ, ასე რომ, სეტიენს ალტერნატიული ვარიანტებიც გაუჩნდა.
მიუხედავად იმისა, რომ ამ მომენტში "ბარსამ" ლიონელ მესის, ლუის სუარესისა და ანტუან გრიზმანის ტრიოსგან მაქსიმუმი უნდა მიიღოს, კლუბმა 17 წლის ანსუ ფატიც გონივრულად უნდა გამოიყენოს, ლა ლიგაში კი "ლა მასიელებს" შანსი უნდა მისცეს, მაგალითად, ალექს კოლიადოსა და რიკი პუჩ+
ს მეტი სათამაშო დრო სჭირდებათ. სეტიენს ფეხბურთელებთან სამუშაოდ დიდ დრო არ აქვს, თუმცა, უქმობის პერიოდში, მას შეეძლო, შესაფერის ტაქტიკაზე ეფიქრა. ამ ყველაფრის ფონზე, მწვრთნელს თამაშის ხარისხის გაუმჯობესება შეუძლია.
3. გამარჯვებულის მენტალიტეტის შეძენა
ერთი რამ, რატომაც კიკე უნდა დავაფასოთ, ის ფაქტია, რომ მას გამარჯვება დაუყოვნებლივ სურს, მაშინ, როცა მწვრთნელთა უმეტესობა აცხადებს, რომ მათ თავიანთი ფილოსოფიის დასანერგად და გუნდის ჩამოსაყალიბებლად დრო სჭირდებათ, თანდათან კი ტიტულებისთვის მებრძოლ შემადგენლობას ჩამოაყალიბებენ. სეტიენმა იცის, რომ "ბარსელონაში" ბევრი ცვლილებაა საჭირო და ის გამოწვევები, რომელიც მან უნდა გადაჭრას, არამხოლოდ ტაქტიკური, არამედ გონებრივიცაა.
კლუბის თავკაცმა ფეხბურთელები საკუთარ თავში უნდა დაარწმუნოს და მათი მოტივირება სცადოს. მათ მხოლოდ ჩემპიონთა ლიგის მოგების რწმენა არ ყოფნით. ტიტულის მოგების სურვილსა და რწმენას შორის აშკარა სხვაობაა. რა თქმა უნდა, მესისა და დანარჩენ მოთამაშეებს ტურნირის მოგება უნდათ, მაგრამ არიან ისინი ამისთვის ფსიქოლოგიურად მზად?! როდესაც ყველაფერი კარგად მიდის და იდეალური პირობებია, დომინირება მარტივია. ამასთან, გასაჭირის დროს, საჭიროა, რომ ამ ვითარებას არ შეეგუო და მისი გამოსწორება სცადო. სეტიენთან ერთად, რამდენიმე ფეხბურთელმა გასახდელ ოთახში სიტუაცია უნდა გააკონტროლოს და აუცილებელი არაა, რომ ეს მხოლოდ მესიმ გააკეთოს.
აღნიშნულის შესრულება ნებისმიერ ქარიზმატულ ადამიანს შეუძლია. ამრიგად, წარმატებისკენ სწრაფვის პირველი ნაბიჯი რწმენაა. თავდაჯერება მნიშვნელოვანი რამაა, რაც კიკე სეტიენმა უნდა აღადგინოს.
დასკვნა
დაცვისა და თავდასხმის გაძლიერება აუცილებელია. დღეის მდგომარეობით, ლაუტარო მარტინესზე ბევრი იწერება. ნახევარდაცვა უკვე საკმაოდ გამოცდილია, თუმცა დახვეწა ამ პოზიციასაც სჭირდება. გარკვეულ ასპექტებში ხარვეზების მიუხედავად, გუნდი კვლავ ძლიერია, თუმცა აუცილებელია, რომ ზემოთხსენებული სისუსტეები აღმოიფხვრას. 61 წლის მწვრთნელმა ამ სეზონისთვის გეგმები შეიმუშავა. ერთ-ერთო მიზანი ესპანეთის ჩემპიონობაა, ამის შემდეგ კი კლუბი ევროპულ ასპარეზზე წარმატების მიღწევას ეცდება. იმის მიუხედავად, "ბარსელონა" ამის გაკეთებას შეძლებს თუ არა, აშკარაა, რომ კიკე სეტიენი ოპტიმისტურადაა განწყობილი.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 12 ]