ჟოზეპ მარია ბართომეუ: ივნისში არ გავკოტრდებით

კატალონიის "ბარსელონას" პრეზიდენტი, ჟოზეპ მარია ბართომეუ კლუბის ეკონომიკურ მდგომარეობასთან დაკავშირებით საუბრობს.

"რთული სიტუაცია გაქვს. 14 მარტის შემდეგ "ბლაუგრანას" სარგებელი არ უნახავს, თუმცა ივნისში ამის გამო არ გავკოტრდებით.

თუ ზაფხულის დასაწყისამდე შესაბამის ზომებს ვერ მივიღებთ, დიდი წაგების წინაშე აღმოვჩნდებით.

დროა, მოქმედება დავიწყოთ. მოლაპარაკებები როგორც მოთამაშეებთან, ისე სპონსორებთან ვაწარმოეთ. ERTE-ს დახმარებით "ბარსელონა" არასპორტული კუთხით მომუშავე პერსონალის სრულ ხელფასს უზრუნველყოფს.

დანაზოგი 16 მილიონ ევროს შეადგენს, რომლის 5.75% მოთამაშეებისაა.

თანხების მისაღებად არანაირი წყარო აღარ შეგვრჩა - მუზეუმი დახურულია, ბილეთებს ვერ ვყიდით, არც სატელევიზიო მაუწყებლობის უფლება გვაქვს.

"ბარსელონა" უბრალოდ იმას აკეთებს, რასაც ევროპის გრანდები - "ბაიერნი", "ლიონი" და "იუვენტუსი" , - ციტირებს ბართომეუს სიტყვებს Marca.

გუშინ "ლურჯ-ბროწეულისფერთა" საფეხბურთო გუნდის წევრებმა ერთხმად დაადასტურეს, რომ კლუბის დასახმარებლად მზად არიან, ხელფასი 70%-ით შეიმცირონ.