Bild: "ბარსელონა" ლეროი სანესთვის იბრძოლებს
გერმანული Bild-ის მიერ გავრცელებულ ინფორმაციას თუ დავუჯერებთ, "ბარსელონა" "მანჩესტერ სიტის" ვარსკვლავით, ლეროი სანეთი დაინტერესდა.
წყაროს ცნობით, სანეს მიმდინარე სეზონის დასრულების შემდეგ "სიტის" დატოვება უნდა. 24 წლის ფეხბურთელის შეძენის მთავარ კანდიდატად "ბაიერნი" ითვლება, თუმცა ახლა საქმეში უკვე "ბარსელონა" და "რეალიც" ჩაერთნენ.
გავრცელებული ინფორმაციით, მიუნხენელები გერმანელი შემტევის წარმომადგენლებს უკვე რამდენჯერმე შეხვდნენ და საკმაოდ მიმზიდველი გრძელვადიანი კონტრაქტი შესთავაზეს. სანეს სამშობლოში დაბრუნების ვარიანტი იზიდავს, მაგრამ მას "ბლაუგრანაში" ან "სამეფო კლუბში" თამაშის შესაძლებლობამ, შესაძლოა, გადაწყვეტილება შეაცვლევინოს. ლეროის მსურველთა რაოდენობის ზრდა მეტ პრობლემას უქმნის "ქალაქელებს", რომლებსაც ფეხბურთელის შენარჩუნების იმედი მაინც აქვთ.
ლეროი სანეს, რომელსაც "სიტისთან" მოქმედი კონტრაქტის ვადა 2021 წლის ზაფხულში ეწურება, მიმდინარე სეზონში, რთული ტრავმის გამო, ჯერ არ უთამაშია. ივარაუდება, რომ ის მალე გამოჯანმრთელდება, თუმცა, ჯერჯერობით, ყველა ჩემპიონატი შეჩერებულია, რისი მიზეზიც კორონავირუსის პანდემიაა.
ამ სიახლეზე კომენტარები გათიშულია.
კომენტარები [ 14 ]