მესის მორიგი რეკორდი და საინტერესო დამთხვევა

ესპანეთის თასის 1/4-ფინალში "ბილბაოსთან" გამართულ მატჩში (1-0) ლეო მესის მონაწილეობა ნიშნავს, რომ არგენტინელი ლეგენდა "ბარსელონას" კიდევ ერთი რეკორდის მფლობელი გახდა.

გუშინდელ შეხვედრაში თამაში ნიშნავს, რომ მესის, ესპანეთის თასზე, 75 თამაში დაუგროვდა, რაც რეკორდის გამეორებაა.

ლეომ ჟოზეპ სამიტიერის მიღწევა გაიმეორა. სამიტიერი "ბარსელონაში" 1919-1933 წლებში თამაშობდა. თასზე თავისი 75-ე და ბოლო თამაში კი მან 1932 წლის 9 ივნისს ჩაატარა. საინტერესოა, რომ იმ მატჩშიც (ფინალში), "ბარსელონას" მეტოქე "ბილბაო" იყო და ის შეხვედრაც ბასკების გამარჯვებით, ანგარიშით 1-0 დასრულდა.

ესპანეთის თასზე "ბარსელონას" მაისურით ჩატარებული მატჩების მიხედვით, მესისა და სამიტიერს ანდრეს ინიესტა (73 თამაში), ვისენს პიერა (71) და ჩავი ერნანდესი (70) მოსდევენ.