"ბარსელონას" "მესტალიაზე" 12 წელია არ წაუგია
ხვალ, 25 იანვარს, ესპანეთის ჩემპიონატის 21-ე ტურის მატჩში, "ბარსელონა" "ვალენსიას" სტუმრად დაუპირისპირდება.
"ღამურები" "ბარსასთვის" იოლ მეტოქედ არასდროს ითვლებოდნენ, მაგრამ უკვე დიდი ხანია, "ბლაუგრანა" "მესტალიას" წაუგებლად ტოვებს.
ლა ლიგაში, "ბარსამ" "ვალენსიასთან" სტუმრად გამართული შეხვედრა ბოლოს 13!! წლის წინ, 2007 წლის 18 თებერვალს დათმო. მასპინძლებმა, დავიდ სილვასა და ანგულოს გოლებით, 2-1 მოიგეს. "ბარსელონას" მხრიდან თავი რონალდინიომ გამოიჩინა.
ერთი წლის შემდეგ, "ვალენსიამ" "მესტალიაზე კიდევ ერთხელ მოიგო, მაგრამ ამჯერად უკვე ესპანეთის თასზე. რუბენ ბარახას გოლისა და ხუან მატას დუბლით, "ღამურებმა" 3-2 მოიგეს. "ბარსელონას" მხრიდან გოლები ანრიმ და ეტო'ომ გაიტანეს.
მას შემდეგ, ამ გუნდებს შორის ვალენსიაში გამართული 14 დაპირისპირებიდან 5 "ბარსამ" მოიგო, ხოლო 9 ფრედ დასრულდა (აქედან 6 ანგარიშით 1-1).
ამ დროის განმავლობაში, "ვალენსიამ" "ბარსა" 3-ჯერ დაამარცხა. 2-ჯერ "კამპ ნოუზე" და ერთხელ "სანჩეს პისხუანზე", ესპანეთის თასის ფინალში.
ამ სიახლეზე კომენტარები გათიშულია.
კომენტარები [ 11 ]