"ბარსელონას" 2014/15 წლების სეზონის გუნდი ათწლეულის საუკეთესოდ დასახელდა
ამერიკულმა Fox Sports-მა, გასული ათწლეულის საუკეთესო სპორტული გუნდის გამოსავლენად, გულშემატკივრებს შორის გამოკითხვა ჩაატარა.
გამოკითხვა ოლიმპიური სისტემით ჩატარდა - წინასწარ შერჩეული 32 გუნდი 16 წყვილში გადანაწილდა, გულშემატკივრებს კი, სოციალური ქსელის საშუალებით, თითოეულ წყვილში გამარჯვებული უნდა გამოევლინათ.
ვინაიდან გამოკითხვა ამერიკულმა კომპანიამ ჩაატარა, გასაკვირი არაა, რომ კანდიდატთა შორის ამერიკული გუნდები ჭარბობდნენ. ფეხბურთს მხოლოდ 3 წარმომადგენელი ჰყავდა - 2014/15 წლების სეზონის "ბარსელონა", 2010 წლის ესპანეთის ნაკრები და 2018/19 წლების სეზონის "ლიონის" ქალთა გუნდი.
"ბარსელონამ", 1/16-ფინალში, 2015/16 წლების სეზონის "გოლდენ სთეით უორიორზი" დაამარცხა; 1/8-ფინალში, 2012/13 წლების სეზონის "მაიამი ჰიტი", 1/4-ფინალში, 2019 წლის აშშ-ს ქალთა ნაკრები; 1/2-ფინალში, 2016/17 წლების სეზონის "გოლდენ სთეით უირიორზი"; ხოლო ფინალში 2011/12 წლების სეზონის "კენტუკის" (კალათბურთი, NCAA) აჯობა.
ფინალურ დაპირისპირებაში, რომელშიც მონაწილეობა 55 ათასზე მეტმა ადამიანმა მიიღო, "ბარსელონას" მხარი გულშემატკივრების 53%-მა დაუჭირა.
2014/15 წლების სეზონში, "ბარსელონამ" სამივე ტიტული მოიგო, ხოლო მესი-ნეიმარი-სუარესის ტრიომ 122 გოლი გაიტანა.
ამ სიახლეზე კომენტარები გათიშულია.
კომენტარები [ 4 ]