"ელ კლასიკოს" არბიტრი ცნობილია
18 დეკემბერს გასამართი "ელ კლასიკოს" მსაჯი ცნობილია. ესპანეთის ფეხბურთის ფედერაციის ოფიციალური ვებგვერდის ინფორმაციით, "ბარსელონასა" და "რეალის" დაპირისპირებას ალეხანდრო ხოსე ერნანდეს ერნანდესი განსჯის.
37 წლის არბიტრი "ელ კლასიკოს" მთავარი მსაჯი მეოთხედ იქნება. აქამდე ჩატარებულ 3 შეხვედრაში სრული თანაფარდობაა - თითო მოგება გუნდებს, 1 ფრე, 6-6 გატანილი გოლი.
ერნანდეს ერნანდესმა "კლასიკოში" პირველად 2016 წლის აპრილში იმსაჯა. "კამპ ნოუზე" გამართული ის თამაში "რეალმა" 2-1 მოიგო. შეხვედრის 82-ე წუთზე სერხიო რამოსმა წითელი ბარათი მიიღო.
ერთი წლის შემდეგ, სტუმრად უკვე "ბარსამ" მოიგო, ანგარიშით 3-2. სერხიო რამოსმა ისევ წითელი ბარათი მიიღო, ამჯერად 77-ე წუთზე.
გაძევების გარეშე არც მე-3 "კლასიკოს" ჩაუვლია. 2018 წლის მაისში, "კამპ ნოუზე" 2-2 დასრულებული შეხვედრის 44-ე წუთზე, ერნანდესმა წითელი სერჟი რობერტოს უჩვენა. იმ შეხვედრაში, მას მე-2 ფეხბურთელის გაძევებაც მართებდა, მაგრამ მსაჯმა გარეთ ბეილი აშკარად დაინდო.
"ბარსელონას", ერნანდეს ერნანდესის მსაჯობით გამართულ 22 შეხვედრაში 15 მოგება, 4 ფრე და 3 წაგება აქვს. ბურთების შეფარდება - 67-26. კატალონიელებმა 44 ყვითელი და 1 წითელი ბარათი მიიღეს.
ამ არბიტრის მსაჯობით ჩატარებულ 20 მატჩიდან "რეალმა" 12 მოიგო, 2 ფრედ დაასრულა და 6 წააგო. ბურთების შეფარდება 50-26. მადრიდელებმა 45 ყვითელი და 4 წითელი ბარათი მიიღეს.
საინტერესოა, რომ ალეხანდრო ხოსე ერნანდეს ერნანდესს "კლასიკოში" მსაჯობის შანსი წინა სეზონშიც ჰქონდა, მაგრამ თამაშამდე მცირე ხნით ადრე მან ტრავმა მიიღო.
ამ სიახლეზე კომენტარები გათიშულია.
კომენტარები [ 3 ]