ანტუან გრიზმანის შემაშფოთებელი სტატისტიკა

ნამდვილად ვერ ვიტყვით, რომ "ატლეტიკოდან" "ბარსელონაში" გადმოსვლის შემდეგ, ანტუან გრიზმანს პროგრესი აქვს. ფრანგი თავდამსხმელის სტატისტიკური მაჩვენებლები სულ უფრო უარესდება და მისი თამაშის ხარისხი ამის კომპენსირებას ვერ ახდენს. 

"სელტასთან" მატჩი, რომელიც "ბარსელონამ" დიდი ანგარიშით მოიგო, გრიზმანისთვის უშედეგო გამოდგა. მან გოლის გატანა ზედიზედ მე-5 მატჩში ვერ მოახერხა. მიმდინარე სეზონში ჩატარებულ 15 შეხვედრაში, მის ანგარიშზე სულ 4 გოლია - "რეალ ბეტისის", "ვილიარეალის" და "ეიბარის" კარში, ჩემპიონთა ლიგაზე კი მას არ გაუტანია. 

წინა სეზონის ამ დროს, ანტუანს 6 გოლი ჰქონდა გატანილი. 

რაც შეეხება პასებს: 28 წლის ფეხბურთელმა "სელტასთან" თამაშში, 73 წუთში, მხოლოდ 21 პასი გააკეთა. შედარებისთვის, უსმან დემბელეს მოედანზე გატარებულ 20 წუთში 43 პასი დაუგროვდა. 

ერთი წლის წინ, გრიზმანს "ატლეტიკოს" შემადგენლობაში 66 პასით მეტი ჰქონდა შესრულებული. 

გრიზმანის აქტიურობის რუკა "ბარსელონა"-"სელტას" მატჩში

რა თქმა უნდა, სეზონის დასრულებამდე ჯერ კიდევ ძალიან დიდი დროა დარჩენილი და გრიზმანს, რომლის სანაცვლოდაც კატალონიურმა კლუბმა მადრიდის "ატლეტიკოს" 120 მილიონი ევრო გადაუხადა, თავისუფლად შეუძლია, სტატისტიკა გამოასწოროს და სეზონი თავისთვის წარმატებული გახადოს. თუმცა, კლუბის ბოლოდროინდელი ძვირადღირებული ტრანსფერების შედეგების გათვალისწინებით, ფრანგის ცუდი სტარტი შეშფოთების საფუძველს ნამდვილად გვაძლევს.