ერნესტო ვალვერდე უმტიტიზე, დე იონგზე, გრიზმანის ფორმასა და გადადებულ "ელ კლასიკოზე"
"ბარსელონას" მთავარმა მწვრთნელმა, ერნესტო ვალვერდემ, "ეიბართან" მატჩის (3-0 მოგება) შემდეგ ჟურნალისტებთან რამდენიმე საკითხზე ისაუბრა.
"ეიბარის" დამარცხება: "კაპაროსმა "კამპ ნოუზე" სტუმრობა დენტისტთან ვიზიტს შეადარა. მე ვფიქრობ, რომ "ეიბართან" სტუმრად თამაში ნამდვილი ტესტია. აქ მოგების მოპოვებისთვის აუცილებლად ძალიან კარგ ფორმაში უნდა იყო. მათი თამაშის სტილს კარგად ვიცნობთ - მათ პრესინგი უყვართ, ამისთვის მზად უნდა იყო, თორემ, გაგიჭირდება. ბოლო წლებში ეს ჩვენზე გავლენას ახდენდა, დღეს კი მეტოქეს უკეთესად გავუმკლავდით".
უმტიტის დაბრუნება: "ტოდიბომ წინა თამაში კარგად ჩაატარა, ამიტომ, გადაწყვეტილების მიღება ადვილი არ ყოფილა. თუმცა, იმის გათვალისწინებით, თუ სად ვთამაშობდით, დაცვაში მეტი გამოცდილება გვჭირდებოდა. უმტიტის პრაქტიკა აკლდა და დღეს გამორჩეული მატჩი იყო".
დე იონგი: "ფრენკიმ სეზონი კარგად დაიწყო. ის ძალიან გვეხმარება. დე იონგი არ ჩერდება, მუდმივად უმატებს და რა თქმა უნდა, ამას გულშემატკივრებიც ამჩნევენ".
გრიზმანი: "დრო გვჭირდება. ისეთი დონის ფეხბურთელები, როგორებიც ანტუანი, მესი და სუარესი არიან, ერთმანეთს აუცილებლად გაუგებენ. დღეს მათ კარგად ითამაშეს და შედეგსაც მიაღწიეს".
კლასიკო: "მჯერა, რომ თამაში სეზონის დასრულებამდე აუცილებლად გაიმართება... არ ვიცი, ალბათ მოდაშია ის, რომ პოლიტიკური საკითხების გამო შეთანხმებები ვერ შედგეს, მაგრამ, იმედი მაქვს, ჩვენ სწორ დროს შევარჩევთ".
ამ სიახლეზე კომენტარები გათიშულია.
კომენტარები [ 54 ]