რა ელის ანსუ ფატის?
მიმდინარე ზაფხულში ანსუ ფატი "ბარსელონას" 19 წლამდელთა გუნდში დაწინაურდა, საიდანაც მისი "ბარსა ბ"-ში გადაყვანა და პირველი გუნდისთვის მომზადება იგეგმებოდა. თუმცა, შემტევი ვარსკვლავების ტრავმებმა ყველაფერი შეცვალა და 16 წლის ბისაუ-გვინეელი ფეხბურთელი პირდაპირ ძირითადი გუნდის განაცხადში აღმოჩნდა.
ფატიმ არა მარტო კარგი შთაბეჭდილება დატოვა, არამედ გუნდს ასისტით და ორი გოლითაც დაეხმარა. მის თამაშს გამოუცდელობა სულაც არ ეტყობა და ლოგიკურია, რომ ანსუ მსოფლიო ფეხბურთის ერთ-ერთ მთავარ ამომავალ ვარსკვლავად მიიჩნევა.
ახლა ყველაფერი შესანიშნავადაა, მაგრამ "ბარსელონას" მთავარი ამოცანა ჯერ კიდევ გადასაწყვეტი აქვს. გუნდის შტაბმა უნდა მოახერხოს, რომ ფატის განვითარებაში ხელი მაქსიმალურად შეუწყოს და ამისთვის საუკეთესო გზა მოძებნოს.
მისი სხვა კლუბში განათხოვრება არ განიხილება, ამ სეზონისთვის კი სამი ძირითადი ვარიანტია.
პირველი თავად ფეხბურთელებისთვის და ასევე გულშემატკივრებისთვის, ალბათ, ყველაზე მისაღები იქნება - ანსუ პირველ გუნდში დარჩება, ყოველდღიურად მსოფლიოს საუკეთესო მოთამაშეებთან ერთად ივარჯიშებს და პროგრესი ექნება. ამის უარყოფითი მხარე ისაა, რომ ერნესტო ვალვერდე მას მოედანზე ხშირად გასვლის გარანტიას ვერ მისცემს, რეგულარულად თამაში კი ასეთ სიტუაციაში აუცილებელია.
ისიც შეიძლება, რომ ფატიმ დროის დიდი ნაწილი ძირითად გუნდში გაატაროს და როცა შემადგენლობაში მისი ადგილი არ იქნება, "ბარსა ბ"-ს შეუერთდეს. ასე, ის სათამაშო პრაქტიკას მიიღებს, მაგრამ ორივე გუნდის წევრობა ადვილი არ იქნება და დიდ დატვირთვას მოითხოვს.
მესამე ვარიანტი კი თავდამსხმელის 19 წლამდელთა გუნდში დატოვებაა, რომელსაც ვიქტორ ვალდესი წვრთნის. აქ "ბარსა ბ"-სთან შედარებით ნაკლები წნეხია და ანსუ თავს უფრო თავისუფლად იგრძნობს, პერიოდულად კი პრაქტიკას ვალვერდეს გუნდშიც გაივლის.
გადაწყვეტილება თავად ფეხბურთელმა და მისმა წარმომადგენლებმა უნდა მიიღონ - ოპტიმალური ვარიანტის შერჩევა და პროგრესის ასეთი ტემპით გაგრძელება ადვილი ნამდვილად არ იქნება, მაგრამ ფატიმ უკვე დაამტკიცა, რომ წნეხთან და რთულ სიტუაციებთან გამკლავება მისთვის დიდ სიძნელეს არ წარმოადგენს.
ამ სიახლეზე კომენტარები გათიშულია.
კომენტარები [ 8 ]