"ბარსელონას" მოულოდნელი დიდი მიღწევა
დორტმუნდის "ბორუსიასთან" უგოლო ფრე, თუნდაც სტუმრად, "ბარსელონასთვის" განსაკუთრებით კარგი შედეგი არ უნდა იყოს, მაგრამ ამ შემთხვევაში ასე აღმოჩნდა. ერნესტო ვალვერდეს გუნდმა, რომლის ერთ-ერთ ყველაზე ძლიერ კომპონენტად, არც ისე დიდი ხნის წინ, სტაბილური დაცვა მიიჩნეოდა, მიმდინარე სეზონში კარი მშრალად პირველად შეინახა.
"დორტმუნდთან" მატჩამდე "ბარსამ" 4 მატჩი ჩაატარა და სულ 7 გოლი გაუშვა. ლა ლიგის პირველ ტურში კატალონიელები ბილბაოს "ატლეტიკთან" 0-1 დამარცხდნენ, ბოლო სამ ტურში კი რეგულარულად ორ ბურთს უშვებენ (5-2 "ბეტისთან", 2-2 "ოსასუნასთან", 5-2 "ვალენსიასთან").
აღსანიშნავია, რომ ამ სეზონში "ბარსელონა" "კამპ ნოუზე" 5-ზე ნაკლებ გოლს არ იტანს, სტუმრად გამარჯვებას კი ვერ ახერხებს.
ესპანეთის მოქმედ ჩემპიონს მომდევნო მატჩი ისევ გასვლაზე ელის, ამჯერად "გრანადასთან", რომელიც სეგუნდა დივიზიონიდან ახლახანს დაწინაურდა, თუმცა "ბარსას" სატურნირო ცხრილში მხოლოდ ბურთების სხვაობით ჩამორჩება.
ასე რომ, კარის მშრალად შენახვის კომპლექსი უკვე მოხსნილია, ნავსის გატეხვას და სტუმრად სამი ქულის აღებას კი "ბარსელონა" 21 სექტემბერს, "ლოს კარმენესზე" ეცდება.
ამ სიახლეზე კომენტარები გათიშულია.
კომენტარები [ 4 ]