რა ხდება ნეიმარის ტრანსფერის ირგვლივ?
შეამჩნევდით ალბათ, რომ ბოლო დროს ესპანური პრესა გაურკვევლობაშია, თავიანთი მონაყოლის თავადაც არ სჯერათ.
გადავხედოთ ნეიმარის შესაძლო ტრანსფერის ირგვლივ მიმდინარე სიტუაციას და შევეცადოთ ლოგიკური დასკვნები გამოვიტანოთ.
ესპანურ პრესაში რამდენიმე სახის ინფორმაცია გავრცელდა ბრაზილიელის "კამპ ნოუზე" შესაძლო დაბრუნების შესახებ: ზოგი წერს, რომ "ბარსელონამ" და "პარი სენ-ჟერმენმა" მოლაპარაკებები დაიწყეს, ზოგი კი ცდილობს ბრაზილიელი ვარსკვლავი მადრიდის "რეალს" დაუკავშიროს.
ლოგიკურია, რომ ნეიმარს მართლაც უნდოდეს რომელიმე ევროპულ გიგანტში გადაბარგება, მათ შორის კი "კამპ ნოუზე" დაბრუნებას განიხილავდეს. მას შემდეგ, რაც ბრაზილიელი პარიზში გადაბარგდა ევროპული ფეხბურთის გულშემატკივარს ნელნელა თავს გვავიწყებს. ფრანგებს ევროასპარეზზე აღსანიშნავი არაფერი გაუკეთებიათ, საფრანგეთის ჩემპიონატში თამაშით კი ნეიმარს დიდების დარბაზში შესვლა უჭირს. ფეხბურთელის ბოლოდროინდელ ინტერვიუებსაც თუ გავიხსენებთ, მან არაერთხელ თქვა, რომ "ბარსელონას" დატოვების გადაწყვეტილების მიღება ძალიან გაუჭირდა და ძველი თანაგუნდელები ენატრება. უკანასკნელ ინტერვიუში კი, როდესაც ჟურნალისტმა მას ჰკითხა, ნანობს თუ არა კატალონიის დატოვებას, მან კითხვას თავი აარიდა.
რაც შეეხებათ "ბარსელონას" ფეხბურთელებს, მათ ნამდვილად სურთ ნეიმარის კლუბში დაბრუნება, ეს მათი ინტერვიუებიდანაც კარგად ჩანს. ისინი ნებისმიერ შემთხვევაში მიესალმებიან ბრაზილიელის დაბრუნებას, განსაკუთრებით კი მისი საუკეთესო მეგობრები - მესი, სუარესი, პიკე, კოუტინიო, არტური, რაკიტიჩი.
ნეიმარის ტრანსფერს ძალიან დიდ პრობლემას შეუქმნის მისი და მამამისის ცუდი ურთიერთობა "ბარსელონას" ხელმძღვანელობასთან, გვახსოვს ექსკატალონიელის კლუბიდან წასვლის პერიოდში არსებული სიტუაცია, შემდეგ იყო სასამართლო დავაც, ნეიმარი "ბლაუგრანასგან" თანხის გამოძალვას ცდილობდა.
პრეზიდენტი ბართომეუ ინტერვიუების დროს ნეიმარს ხოტბას ნამდვილად არ ასხამს, ბოლო დროს მან ისიც თქვა, რომ ბრაზილიელს დემბელე სჯობს. ნეიმარის სურვილის შემთხვევაშიც კი დიდია შანსი იმისა, რომ "ბარსელონამ" მისი შეძენა არ მოინდომოს. ერთადერთი ფაქტორი, რამაც შეიძლება მათ აზრი შეაცვლევინოს არის "ბარსელონას" ამჯამინდელი მდგომარეობა, კლუბს ახლა ნამდვილად სჭირდება ისეთი დონის ფეხბურთელი, როგორიც ნეიმარია.
რაც შეეხება "პარი სენ-ჟერმენს", ისიც უცნობია, რამდენად დათანხმდებიან პარიზელები ნეიმარის გაყიდვას, ან თუ ასე მოხდება, ისიც საკითხავია რამდენს მოითხოვენ ისინი ფეხბურთელის სანაცვლოდ.
საბოლოო ჯამში რომ შევაფასოთ, ამ მომენტისთვის "კამპ ნოუზე" ნეიმარის შესაძლო დაბრუნება რეალობას მოწყვეტილია, მიუხედავად იმისა, რომ ზოგი ესპანური ჟურნალი საპირისპიროს გვიმტკიცებს. ნებისმიერ შემთხვევაში ამ ტრანსფერის განხორციელება ურთულესი იქნება.
როგორც ზემოთ ვთქვი, პარიზული კლუბის ბოლოდროინდელი სიტუაციიდან გამომდინარე, დიდია შანსი იმისა, რომ ნეიმარმა კლუბი ამ ზაფხულს დატოვოს. მისთვის იბრძოლებს "რეალი", ეს კი წესით "ბარსელონას" არ უნდა მოეწონოს და პრეზიდენტ ბართომეუს, უნდა თუ არ უნდა, ნეიმარის "გათეთრების" თავიდან ასაცილებლად მისი ყიდვისთვის უნდა იბრძოლოს.
არის კიდევ ერთი ფაქტორი: "ბარსელონას" ლიდერები. როგორც ვიცით, მათ სიტყვას კლუბის ხელმძღვანელობისთვის ძალიან დიდი ფასი აქვს, ამიტომ, შესაძლოა, ამანაც შეუწყოს ხელი ბრაზილიელის "კამპ ნოუზე" დაბრუნებას.
ამ სიახლეზე კომენტარები გათიშულია.
კომენტარები [ 13 ]