ბოლო მატჩი ფეხბურთელის რანგში - ჩავი ერნანდესმა კარიერა დაასრულა
აზიის ჩემპიონთა ლიგის მე-6 ტურში, ირანში, ერთმანეთს "პერსეპოლისი" და "ალ სადი" დაუპირისპირდნენ. სტუმართა რიგებში, ძირითად შემადგენლობაში იყო ჩავი ერნანდესი, რომლისთვისაც ეს მატჩი საფეხბურთო კარიერაში ბოლო გახლდათ. დღეიდან, ესპანელი სრულ კონცენტრაციას ძლიერ მწვრთნელად ჩამოყალიბებაზე მოახდენს და ყატარული კლუბის სამწვრთნელო შტაბში იმუშავებს.
ჩავი ფეხბურთის ისტორიაში ერთ-ერთი საუკეთესო ნახევარმცველად დიდი ხნის წინ შევიდა. ის "ლა მასიას" აკადემიაში 1991 წელს, 11 წლის ასაკში ჩაირიცხა, პირველ გუნდში დებიუტი კი 1998 წელს ჰქონდა.
2015 წლამდე, კატალონიელმა ფეხბურთელმა "ბარსელონაში" 767 მატჩი ჩაატარა და გუნდს შემდეგი ტიტულების მოგებაში დაეხმარა: 8 ლა ლიგა, 3 კოპა დელ რეი, ესპანეთის 6 და ევროპის 2 სუპერ თასი, 4 ჩემპიონთა ლიგა და 2 საკლუბო მსოფლიო ჩემპიონატი. ამ პერიოდში, ჩავი UEFA-ს წლის სიმბოლურ გუნდში 5-ჯერ, FIFPro-ს საუკეთესო თერთმეტეულში კი 6-ჯერ მოხვდა. 2010 და 2011 წლებში, ის ოქროს ბურთის მოგების კანდიდატიც იყო.
ჩავის მოედნის ხედვა განუმეორებელი იყო: ის სივრცეების პოვნას და ზუსტი პასების გაკეთებას თითქმის ყოველთვის ახერხებდა. ანდრეს ინიესტასთან, სერხიო ბუსკეტსთან და ლიონელ მესისთან ერთად, მან ტიკი-ტაკა უმაღლეს დონეზე აიყვანა.
[media=https://www.youtube.com/watch?v=ZGyYUrTyRbc]
"ბარსელონურ" კარიერაზე არანაკლებ წარმატებული ჩავის სანაკრებო კარიერა (2000-14) იყო: ის ესპანეთის უძლიერესი ნაკრების ერთ-ერთი ლიდერი იყო და 2010 წელს მსოფლიოს თასი, 2008 და 2012 წელს კი ევროპის ჩემპიონატი მოიგო.
2015-19 წლებში, ერნანდესი "ალ სადის" ღირსებას იცავდა. აქ, მან პირველი ტიტული "ელ ჯაიშთან" ყატარის თასის ფინალში გამარჯვებით მოიპოვა. თამაშის პარალელურად, კატალონიელმა სამწვრთნელო კარიერისთვის მზადება დაიწყო და ლიცენზიაც მოიპოვა, რომლის საშუალებითაც, მას მალე ლა ლიგის გუნდების გაწვრთნა შეეძლება.
ჩავიმ "ბარსელონას" სათავეში ჩადგომის სურვილი უკვე არაერთხელ გამოთქვა, თუმცა, ის ფიქრობს, რომ ასეთი პასუხისმგებლობისთვის ჯერ მზად არ არის და როგორც მწვრთნელს, საწყისი გამოცდილების მიღება აზიაში ურჩევნია.
ამ სიახლეზე კომენტარები გათიშულია.
კომენტარები [ 13 ]