ნაკლები სათამაშო დრო აპრილის თვეში
სამწლიანი ლოდინის შემდეგ ლიონელ მესი ჩემპიონთა ლიგის 1/2-ფინალში დაბრუნდა. იგი არაჩვეულებრივ ფორმაშია და პრაქტიკულად მეტოქისთვის შეუჩერებელია. არგენტინელის მნიშვნელობაზე საუბარიც კი ზედმეტია. ამის დასამტკიცებლად ლა ლიგის ბოლო თამაშის გახსენებაც კი კმარა. "ლევანტესთან" მატჩი მესიმ სათადარიგოთა სკამზე დაიწყო, მეორე ტაიმში მოედანზე შემოვიდა და ჩემპიონობის მომტანი გოლიც შეაგდო.
აპრილის თვეში ერნესტო ვალვერდე მესის დასვენებას შეძლებისდაგვარად ცდილობდა. მართალია, იგი "ბლაუგრანას" საკვანძო ფეხბურთელია, თუმცა დასვენება და ძალების აღდგენა სჭირდება. არგენტინელი თითქმის 32 წლისაა. ეს ის პერიოდია, როცა რთულია სრული 90 წუთის თამაში, განსაკუთრებით როცა კლუბი სამ ფრონტზე იბრძვის.
პირველი ნაბიჯი მარტის სანაკრებო პაუზიდან ნაადრევი დაბრუნება იყო. მართალია, მესის მიკრო ტრავმა ჰქონდა, თუმცა გარისკვად არ ღირდა და არგენტინელი ბარსელონაში ჩამოვიდა, რათა საკლუბო მატჩებისთვის მომზადებულიყო.
აპრილის თვეში ლიონელ მესის არასდროს ჰქონია ამდენი დასვენება. გასულ სეზონებში ნაკლები სათამაშო დროის მიზეზი ტრავმები იყო. აპრილის თვეში "ბარსელონამ" 8 მატჩი ითამაშა, აქედან ოთხი შეხვედრა მესიმ სათადარიგოთა სკამიდან დაიწყო. ითამაშა 465 წუთი.
მწვრთნელისთვის ყოველთვის რთულია სათადარიგოთა სკამზე დატოვო ფეხბურთელი, რომელისთვისაც წლების განმავლობაში ეს სრულიად უცხო იყო. თუმცა მესისთვის რაღაცები შეიცვალა. ის უკვე აანალიზებს, რომ დასვენებაც აუცილებელია. ეჭვი არავის ეპარება, რომ არგენტინელი "ლივერპულთან" სასტარტო შემადგენლობაში იქნება და შეეცდება თავის გამოჩენას.
ამ სიახლეზე კომენტარები გათიშულია.
კომენტარები [ 14 ]