ერთი თვე, რომელიც ფილიპე კოუტინიოს მომავალს გადაწყვეტს
ფილიპე კოუტინიოს მდგომარეობა "ბარსელონაში" სერიოზულ შეშფოთებას იწვევს. ბრაზილიელმა ფეხბურთელმა საკუთარი თამაშის დამსახურებით, ძირითად შემადგენლობაში ადგილი დაკარგა და გავრცელდა ინფორმაცია, რომ ის, შესაძლოა, ინგლისში დაბრუნდეს.
"ბარსას" და კოუტინიოს წარმომადგენლები ერთმანეთს შეხვდნენ. მათ ტრანსფერზე არ უსაუბრიათ, თუმცა, ფეხბურთელის ფორმა განიხილეს. კიდევ ერთი შეხვედრა ჩემპიონთა ლიგის მეოთხედფინალების შემდეგ შედგება, რის შემდეგაც, წესით, მის მომავალთან დაკავშირებით საბოლოო გადაწყვეტილება უნდა გახდეს ცნობილი.
კოუტინიოს შესაძლებლობებში "ბარსელონას" ხელმძღვანელებს ეჭვი არ ეპარებათ, მაგრამ ბრაზილიელი საუკეთესო ფორმისგან უკვე დიდი ხანია, შორს არის, რაც კატალონიელებს აფიქრებთ. თანაც, ბოლო დროს თამაში უსმან დემბელემ გააუმჯობესა, რომელიც ერნესტო ვალვერდეს სქემაში სწორედ ფილიპეს ადგილს იკავებს და ტრავმის მოშუშების შემდეგ, თუ სიტუაცია არ შეიცვალა, სასტარტო შემადგენლობის ძირითადი წევრი ის იქნება.
ფრანგის გამოჯანმრთელებამდე კი, ანუ მომდევნო ერთი თვის განმავლობაში, კოუტინიოს კიდევ ერთი შანსი ექნება. ამ პერიოდში მან თავი აუცილებლად უნდა გამოიჩინოს, თორემ, მიუხედავად იმისა, რომ კლუბი მის გაშვებაზე ახლა არ ფიქრობს (ყოველ შემთხვევაში, გავლენიანი Sport-ის ინფორმაციით ეს ასეა), მისი შეძენა არაერთ ევროპულ კლუბს სურს და თუ 26 წლის შემტევი არ მოუმატებს, "ბარსელონა" იძულებული გახდება, მის გაშვებაზე და ფინანსური სარგებლის მიღებაზე იფიქროს.
"ბარსამ" კოუტინიოში 120 მილიონი ევრო გადაიხადა, ბონუსების სახით კი "ლივერპულს" 40 მილიონი ერგო. ის კლუბის ისტორიაში ყველაზე ძვირიანი შენაძენია და თავდაპირველად ანდრეს ინიესტას შემცვლელად განიხილებოდა, შემდეგ კი ნახევარდაცვიდან შეტევაში გადაინაცვლა და მესის და სუარესის გვერდით აღმოჩნდა, აქ თამაში კი, როგორც ვნახეთ, ისეთ დონეზე არ გამოუვიდა, რაც დამაკმაყოფილებელი იქნებოდა.
ასე რომ, მომდევნო ერთ თვეში ფილიპე კოუტინიოს მნიშვნელოვანი გამოცდა ელის. თუ კატალონიურ Sport-ს დავუჯერებთ, ყველაფრის მიუხედავად, "ბარსელონას" სამწვრთნელო შტაბი მაინც იმედიანად არის განწყობილი.
ამ სიახლეზე კომენტარები გათიშულია.
კომენტარები [ 25 ]