"ეიბარი" მარკ კუკურელიას გამოსყიდვას აპირებს
"ბარსელონას" საკუთრებაში მყოფი და "ეიბარში" განათხოვრებული მარცხენა მცველი მარკ კუკურელია, დიდი ალბათობით, ბასკურ კლუბში დარჩება.
20 წლის ფეხბურთელთან დაკავშირებით კომენტარი "ეიბარის" სპორტულმა დირექტორმა, ფრან გარაგარსამ გააკეთა: "მარკ კუკურელიას შესაძლებლობებისა და ნაჩვენების თამაშის გათვალისწინებით, მის გამოსყიდვაზე ვფიქრობთ. მან სასიამოვნოდ გაგვაოცა და მადლობა "ბარსას", რომ ეს ფეხბურთელი იჯარით დაგვითმო." - ციტირებს გარაგარსას სიტყვებს Sport.
კატალონიელი ჟურნალისტების ინფორმაციით, "ეიბარში" დარჩენის წინააღმდეგი არც თავად ფეხბურთელია.
კუკურელიამ, მიმდინარე სეზონში, 12 მატჩი ჩაატარა, აქედან 8 შემთხვევაში ის სასტარტო შემადგენლობაში იყო. 20 წლის მარცხენა მცველის ანგარიშზე 2 საგოლე გადაცემაა. განსაკუთრებით შთამბეჭდავი იყო კუკურელიას თამაში "რეალის" წინააღმდეგ (3:0), როდესაც ფეხბურთელმა სამივე გოლში აქტიური მონაწილეობა მიიღო.
შეგახსენებთ, რომ ხვალ, თბილისის დროით 21:30 საათზე, "ბარსელონა" სწორედ "ეიბარს" დაუპირისპირდება.
ამ სიახლეზე კომენტარები გათიშულია.
კომენტარები [ 4 ]